Познат стратег предупредува дека падот на биткоинот ќе предизвика верижни ефекти

Мајкл Бери, кој стана познат благодарение на облогот против американскиот пазар на недвижности пред финансиската криза во 2008 година, предупреди дека падот на биткоинот би можел да се продлабочи во „спирала на смртта“, правејќи трајна штета за компаниите што во последната година ја натрупаа оваа криптовалута.

Во објава на платформата Сабстек (Substack), Бери наведе дека најголемата криптовалута, која од октомврискиот врв падна за 40 отсто, е демистифицирана како исклучиво шпекулативен имот, бидејќи не успеала да се афирмира како заштита од девалвација на парите, по примерот на благородните метали. Натамошни загуби, според него, би можеле брзо да ги оптоварат билансите на најголемите сопственици, да придонесат за принудни продажби низ целиот криптоекосистем и да започнат широкораспространето уништување на вредноста.

„Сите одбивни сценарија сега станаа достижни“, напиша Бери. Ако биткоинот падне уште за 10 отсто, „Стратеџи“ (Strategy Inc.), најголемата корпоративна криптотрезорска компанија на светот, ќе биде во минус од повеќе милијарди долари и „суштински ќе остане без пристап до пазарите на капитал“. Натамошни падови, додава тој, ќе ги турнат рударите на биткоин во банкрот.

Неговите коментари доаѓаат во момент кога биткоинот во вторникот падна под 73.000 долари, на најниско ниво од кога претседателот Доналд Трамп се врати во Белата куќа пред нешто повеќе од една година. Аналитичарите нудат цел спектар на објаснувања за овој пад, од ослабувањето на приливот на капитал, преку влошувањето на ликвидноста, до пошироката загуба на макроекономска привлечност. Некои трговци што се длабоко вклучени во криптоекосистемот исто така се дистанцираат од економијата на токените, вртејќи се кон обложување на настани, бидејќи пазарите за предвидување доживуваат процут.

Биткоинот не реагираше на вообичаените поттикнувачи како што се ослабувањето на доларот или геополитичките ризици, за разлика од златото и среброто, кои скокнаа на рекордни нивоа додека глобалните тензии ги поттикнаа стравовите од девалвацијата на доларот.

„Не постои органска, оправдана причина поради која биткоинот би забавил или запрел со падот“, напиша Бери.

Bloomberg

Прифаќањето на токените од страна на корпоративните трезори и новите спот берзански фондови (ЕТФ) поврзани со криптовалути не е доволно за неограничена поддршка на неговата цена, ниту за да се спречат разорни последици во случај на стрмен пад, вели стратегот. Како што наведува тој, речиси 200 јавни компании поседуваат биткоин.

Иако тоа помогна во ширење на побарувачката, „во трезорските средства нема ништо трајно“, напиша тој.

Трезорските средства мора да се вреднуваат по пазарната вредност и да се вклучат во финансиското известување. Ако цената на биткоинот продолжи да паѓа, менаџерите за ризици ќе почнат да ги советуваат компаниите да продадат, предупредува Бери.

Тој додава дека појавата на спот ЕТФ-ови само дополнително ја распламтила шпекулативната природа на биткоинот, со истовремено зголемување на неговата корелација со берзите на акции. Корелацијата на биткоинот со индексот S&P 500 во последно време се приближи на ниво од 0,50, пишува тој. Теоретски, принудните ликвидирања ќе се активираат агресивно кога загубите во позициите ќе почнат да растат.

Бери додава дека биткоин  ЕТФ-овите бележат некои од најголемите еднодневни одливи уште од крајот на ноември, при што три такви дена се случиле во последните десет дена од јануари.

Сепак, иако Бери предупредува на последиците, отпечатокот на криптопазарот сѐ уште е премал за да поттикне широка зараза. Пазарната вредност на биткоинот под 1,5 билион долари, ограничената изложеност на домаќинствата и тесното корпоративно прифаќање укажуваат на тоа дека евентуалниот ефект на богатството веројатно ќе остане ограничен.

Според некои мерила, балоните на дигиталните средства во корпоративните трезори веќе пукале. Претходните колапси, од Terrа до FTX, не ги заразија традиционалните пазари. Биковите сега укажуваат на регулаторната јасност и ниските процени како гориво за брзото ново закрепнување.

Но како што биткоинот продолжува да паѓа под одредени клучни нивоа, Бери смета дека може да ги контаминира и пошироките пазари. Како делумен причинител за неодамнешниот колапс на златото и среброто тој го наведува падот на криптовалутата, бидејќи корпоративните трезори и шпекулантите морале да го намалат ризикот преку продажба на профитабилни позиции во токенизирани фјучерси на злато и сребро.

Овие токенизирани фјучерси на метали не се покриени со вистински физички метали и можат да го преплават тргувањето со физички метали, предизвикувајќи, како што вели, „колатерална спирала на смртта“.

„Изгледа дека до крајот на месецот, како последица на падот на цената на криптовалутите, ќе бидат ликвидирани и до милијарда долари во благородни метали“, напиша Бери. Ако биткоинот падне на 50.000 долари, рударите ќе банкротираат, додека „токенизираните фјучерси на метали ќе потонат во црна дупка без купувачи“, додава тој.