Политичките ризици го спуштија еврото на најниско ниво во последните 17 месеци

Еврото падна на најниско ниво од мај 2025 година, бидејќи се засили загриженоста на инвеститорите за политичките и фискалните ризици во регионот.

Заедничката валута падна за дури 0,8 отсто, достигнувајќи 1,1161 долар за евро во азиското тргување. Фондовите во Азија што се стремат кон брза заработка продаваа евра за долари во спот-тргувањето, според трговци кои побараа да останат анонимни бидејќи не се овластени да зборуваат јавно. Тоа ги потисна цените под бариерните нивоа, предизвикувајќи продажба поврзана со опциите, што дополнително го продлабочи падот, рекоа тие.

Извештаите дека претставници на шпанската влада се подготвуваат за предвремени избори дополнително ја зголемија загриженоста што го потресува францускиот пазар на обврзници. Во петокот, премијата што инвеститорите ја бараат за да држат француски обврзници наместо соодветни германски државни обврзници достигна 152 базични поени, првпат од 2011 година.

Bloomberg

„Пазарите на обврзници и валути јасно ја сигнализираат вознемиреноста на инвеститорите поради растечката нестабилност на француската влада и слабеењето на фискалното сидро на земјата пред изборите во 2027 година“, рече Хомин Ли, макростратег во „Ломбард Одие Сингапур“ (Lombard Odier Singapore Ltd.).

Инвеститорите се сè позагрижени за политичките околности во Франција, каде што опозициските партии покажуваат мала подготвеност за компромис со администрацијата во заминување на претседателот Емануел Макрон пред гласањето следната година. Се очекува кандидатката на крајната десница Марин Ле Пен и нејзиниот ривал од крајната левица Жан-Лик Меланшон да влезат во вториот изборен круг, според анкета објавена минатата недела.

Во петокот, стратезите на „ЏП Морган“ (JPMorgan), меѓу кои и Мира Чандан, забележаа дека движењата на францускиот пазар на обврзници сè уште не се вградени во курсот на еврото и посочија дека тоа е ранливо на натамошна продажба, особено во однос на швајцарскиот франк и јенот.

„Еврото сè уште не го одразува проширувањето на распонот кај француските државни обврзници (OAT) и поврзаните ризици од екстремни исходи“, напишаа тие. „Курсот на еврото во однос на швајцарскиот франк е превисок и може да продолжи да се коригира надолу.“ Еврото во понеделникот падна во однос на швајцарскиот франк трета трговска сесија по ред, за околу 0,5 отсто.

Еврото е под притисок и поради зајакнувањето на доларот, кој добива поддршка од очекувањата дека Фед ќе треба да ги зголеми каматните стапки уште трипати до јуни за да ја заузда инфлацијата. Индексот Bloomberg Dollar Spot во понеделникот се искачи на највисоко ниво од крајот на јуни.

-Со помош на Рут Карсон