Остриот извештај на американскиот „Хинденбург рисрч“ (Hindenburg Research) во петокот ја забрза распродажбата на корпоративната империја на Гаутам Адани, бришејќи речиси 50 милијарди долари од пазарната вредност за помалку од два трговски дена.
Тоа го зголеми притисокот врз индискиот тајкун, бидејќи ерозијата на неговата нето-вредност се заканува да го влоши расположението на инвеститорите кон продажбата на акции од неговата водечка компанија, „Адани ентерпрајсес“ (Adani Enterprises), вредна дури 2,5 милијарди долари. Загубите се забрзаа дури и кога групацијата „Адани“ ги оспори наводите на „Хинденбург“ во разговор со сопствениците на обврзници во четвртокот и вети дека ќе издаде детален демант в петок.
„Адани ентерпрајсес“ изгуби дури 9,7 отсто во петокот, лизгајќи се под нивото од 3.276 рупии (36,9 евра). „Адани грин енерџи“ (Adani Green Energy) и „Адани тотал гас“ (Adani Total Gas) паднаа за 20 отсто, додавајќи загуба од 12 милијарди долари на вкупните загуби на групацијата во средата. Индиските пазари беа затворени во четвртокот.
Акциите на групацијата „Адани“ паднаа откако „Хинденбург“ го објави својот извештај / Bloomberg
Падот на акциите на Адани следува по неверојатните добивки во текот на изминатите неколку години, вклучувајќи и некои од најголемите приноси во Азија во 2022 година.
Загриженост за финансиите на групата имаше и во текот на подемот на тајкунот, при што „Кредит сајтс“ (CreditSights) во август изјави дека конгломератот на Адани е „длабоко презадолжен“ со „растегнати биланси“. Но извештајот на „Хинденбург“ го доведе корпоративното управување на групацијата - како и другите индиски компании - во центарот на вниманието.
„Проблемите удираат во срцевината на корпоративниот сектор во Индија, во кој доминираат низа конгломерати контролирани од семејства“, вели Гери Дуган, главен извршен директор на „Глобал ЦИО офис“ (Global CIO Office). „По својата природа тие се нетранспарентни и глобалните инвеститори треба да ја преиспитаат својата доверба во тамошното корпоративно управување“.
„По минатогодишните блескави перформанси, индиските акции и акциите на која било компанија од висок профил се изложени на ризик од распродажба“, додава Дуган. „Затоа, поширокиот индиски пазар на акции би можел да биде изложен на ризик од понатамошен пад, со Адани како катализатор“.
Индискиот референтен индекс S&P BSE Sensex изгуби повеќе од 1 процент во петокот, што е најлошото остварување во Азија.
За потсетување, „Хинденбург“ издаде извештај на 24 јануари, во кој детално се опишани опширните наводи за корпоративни престапи по двегодишната истрага за компаниите на тајкунот. Групацијата „Адани“ соопшти дека истражува правна постапка по „злонамерниот и непоткрепен“ извештај. „Хинденбург“, пак, посочи дека целосно стои до својот извештај, додавајќи дека секоја правна постапка против нив би била бесмислена.
Компаниите поврзани со групацијата „Адани“ во петокот објавија детален одговор на извештајот, кој го опишале како „лажен“, според изјавите на сопствениците на обврзници што се приклучиле на конференцискиот повик со директорите на „Адани“ во четвртокот. За време на повикот, на инвеститорите им било кажано дека тврдењата на „Хинденбург“ за сметководствена измама „не се фактички“.
„Хинденбург рисрч“ го објави својот извештај токму во моментот кога „Адани ентерпрајсес“ се обидуваше да привлече поширока мрежа на локални и глобални инвеститори за продажба на своите акции. Трансакцијата, досега најголемата примарна следствена јавна понуда (FPO) во Индија, веќе привлече голем број мејнстрим-инвеститори пред извештајот на „Хинденбург“, иако инвеститорите на мало и богатите поединци можат да наддаваат за акциите од денеска до 31 јануари.
Тргувањето започна благо, со делови резервирани за инвеститорите на мало и вработените во компанијата што добија понуди за 1 процент од акциите на продажба од 11.30 часот во Мумбај. Некои од институционалните инвеститори сè уште немаат добиено понуди, покажуваат податоците на берзата.
И покрај ова, инвеститорите во индиските јавни понуди обично чекаат до последниот ден од продажбата за да ги поднесат своите понуди.
„За трговците на пазарот, тајмингот е сè и моменталната ситуација со лансирањето на FPO на Адани и негативниот извештај им помогна на трговците да ја искористат ситуацијата“, рече Девен Чокси, управен директор на „КР Чокси холдингс“ (KRChoksey Holdings) во Мумбај.
.webp){kind=icon}
