text size
Досегашните резултати од лабораториските геолошки истражувања во областа на босанската општина Језеро на запад на Република Српска, кај Јајце, покажаа високи нивоа на злато, до 27,5 грама на тон.
Милош Бошњаковиќ, генерален директор на компанијата „Ликос Балкан метал“ (Lykos Balkan Metals), која го спроведува истражувањето, вели дека на три локации во општината Језеро се потврдени високи нивоа на злато, на контакти на различни литостратиграфски единици, до неверојатни 27,5 грама на тон, во континуитет од дури 60 метри.
„Ова е невообичаено висока содржина дури и за светски познатите рудници за злато“, нагласи Бошњаковиќ.
„Ликос металс“, компанија што котира на Австралиската берза (ASX), од минатата година спроведува геолошки истражувања во областа на Језеро преку својата подружница „СНК метали“. За проектите во Република Српска првично беа обезбедени 15,5 милиони конвертибилни марки (7,9 милиони евра).
Lykos Balkan Metals
Тестирањето на примероците во акредитирана лабораторија откри многу висок потенцијал за продолжување на геолошките истражувања, што е и значаен инвестициски потенцијал за развој не само на таа општина туку и за подобрување на квалитетот на животот на жителите и за подобрување на економските услови во поширокото подрачје, се наведува во соопштението на компанијата.
Иако истражувањето сè уште е во рана фаза, од „Ликос“ велат дека овие прелиминарни резултати може да се сметаат за едни од најдобрите во Босна и Херцеговина, но и на Балканот. Во 2023 година, компанијата треба да инвестира повеќе од 60 милиони конвертибилни марки (30 милиони евра) само во општината Језеро.
За детални информации за наоѓалиштето, концентрацијата и количеството на злато, претстојат години детална работа на локалитетот. Затоа, менаџментот на „Ликос металс“ ја повика Владата на Република Српска да соработува во реализацијата на овие странски инвестиции за да се постигне максимален ефект врз натамошниот економски развој на Република Српска, но и на Босна и Херцеговина во целина.
.webp){kind=icon}
