text size
Руската нафтена компанија „Гаспром“ соопшти дека нема никаков документ кој би овозможил извоз на опремата потребна за гасоводот „Северен тек 1“ од Канада, каде што моментално се врши ремонтот. Ова се чини дека доста го компликува враќањето во нормала на протокот на гас од Русија долж овој гасовод, со што полека се исполнуваат црните сценарија.
Имено поради западните санкции против Руската Федерација веќе беше искомплициран процесот на трансфер на технологија, па рускиот нафтен гигант минатиот месец го намали капацитетот долж гасоводот на 40 отсто од нормалното ниво на гас. Како причина тој го наведе доцнењето со враќањето на опремата што во Канада ја сервисира германски Сименс.
За Канада да не ги прекрши санкциите, планот беше прво да го испорача моторот за гасната турбина во Германија, која потоа ќе го испрати во Гаспром. Сепак, руската државна компанија во кратка објава на Твитер сега изрази сомнеж дека работите ќе се одвиваат без проблеми.
„Гаспром нема никаков документ што би му дозволил на Сименс да го испорача моторот со гасна турбина за компресорската станица Портоваја од Канада, каде што моторот моментално се поправа“, соопшти компанијата.
Како што додаваат, под овие околности се чини невозможно да се дојде до објективен заклучок за понатамошниот развој во врска со безбедното спроведување на операциите на компресорската станица Портоваја. Според нивното мислење, тоа е клучен објект за гасоводот Северен тек 1.
Да потсетиме, како што претходно објави Блумберг, цените на гасот во Европа скокнаа по намалувањето на понудата преку Северен тек 1, па фјучерсите пораснаа за осум отсто кон средината на минатиот месец.
.webp){kind=icon}
