Јагленот може да држи вртоглави цени со години

Извонредниот пораст на јагленот, од заборавено гориво до една од најбараните суровини во светот, веројатно ќе трае со години.

Плановите на Европа да се одвикне од руските горива ќе го засилат пазарот на јаглен на два различни начина, од кои и двата би требало да ги надујат цените на поморскиот превоз во блиска иднина, според аналитичарите на „Фич солушнс“ (Fitch Solutions).

Забраната на ЕУ за рускиот јаглен, која започнува овој месец, ќе ја зголеми побарувачката за увоз од други земји како Индонезија, па дури и Австралија. Во меѓувреме, плановите за замена на увозот на руски гас со пратки на течен природен гас ќе остави помалку гориво за другите земји, принудувајќи ги да користат повеќе јаглен.

Bloomberg

Fitch „значително“ ја зголеми прогнозата за цените на термалниот јаглен во Азија за оваа година, но и понатаму. Сега очекува горивото натоварено во австралиското пристаниште Њукасл годинава во просек да чини 320 долари за тон и 246 долари по тон во просек од 2022 до 2026 година, што е повеќе од претходните прогнози за 230 и 159 долари соодветно.

Цените на јагленот во Азија достигнаа рекорд претходно оваа година, откако руската инвазија на Украина го влоши веќе затегнатиот пазар. Рударите се борат да ја следат зголемената побарувачка, додека комуналните претпријатија се обидуваат да обезбедат гориво.

Движењата на пазарите на фјучерси на јаглен исто така укажуваат дека високите цени ќе продолжат. Договорната цена за јагленот Њукасл за декември 2026 година е 233,15 долари за тон, што е зголемување во однос на 111,15 долари на почетокот на оваа година и 80,80 долари на почетокот на 2021 година.