Авион на „Ер Канада експрес“ (Air Canada Express) со 76 патници и членови на екипажот се судри со пожарникарско возило веднаш по слетувањето на аеродромот „Ла Гвардија“ во Њујорк, при што загинаа двајцата пилоти, соопштија властите од Њујорк и Њу Џерси.
Според соопштението на „Џез авиејшн“ (Jazz Aviation LP), авионот со 72 патника и четворица членови на екипажот по летот од Монтреал удрил во возилото на аеродромот. Фотографиите од местото на несреќата покажуваат сериозно оштетување на предниот дел од авионот, вклучувајќи ја и пилотската кабина.
Инцидентот се случил околу 23:47 часот по локално време, а лошите временски услови претходно предизвикале одложувања на летовите на „Ла Гвардија“. Аеродромот останува затворен за летови од САД и Канада најмалку до 14 часот по локално време.
Снимки од комуникацијата со контролата на летови покажуваат дека пожарникарското возило добило дозвола да ја премине пистата на која авионот требало да слета, а по тоа следувала итна команда за запирање. Контролорот потоа им соопштил на пилотите дека дошло до судир и дека на местото на несреќата веќе реагираат службите.
Ова е трет сериозен инцидент со комерцијален авион на американско тло во последните 15 месеци, откако во јануари 2025 година регионален авион на „Американ ерлајнс“ (American Airlines) се судри со воен хеликоптер кај Вашингтон, а во ноември истата година товарен авион на УПС (UPS) експлодира по полетување од Луизвил, Кентаки.
Националниот одбор за безбедност во сообраќајот (NTSB) испрати тим за истрага на местото. Слични инциденти, познати како „упади на пистата“, се почести од судири во воздухот, само во јануари биле регистрирани 97 случаи во САД.
„Ла Гвардија“ е трет најфреквентен аеродром во регионот на Њујорк, со повеќе од 30 милиони патници годишно, претежно на домашни летови. Инцидентот ја отвора дискусијата за безбедноста на аеродромите и потребата од модернизација на контролата на воздушниот сообраќај.
.webp){kind=icon}
