Сојузниците на Трамп прават силни напори за влијание врз Фед

Претседателот Доналд Трамп и неговите сојузници повторно се обидуваат да ги преобликуваат Федералните резерви (Фед) откако Врховниот суд оваа недела го блокираше обидот за разрешување на гувернерката Лиса Кук.

Највисоки функционери и надворешни сојузници активно разгледуваат начини да ги отстранат членовите на Одборот на гувернери на Федералните резерви во Вашингтон за да отворат пат за повеќе кандидати на самиот претседател, според лица запознаени со ова прашање. Кук останува цел откако Врховниот суд засега ѝ дозволи да остане на функцијата, како и поранешниот претседател Џером Пауел, посочуваат изворите, кои сакаа да останат анонимни.

Иако одлуката на Врховниот суд ја зацврсти независноста на Федералните резерви од извршната власт, поединечни познавачи на работата на Фед истакнаа дека одлуката е тесно дефинирана и предупредија дека таа не ја штити целосно централната банка од идни политички напади. Сојузниците на Трамп сметаат дека одлуката обезбедува процедурална мапа на патот за успешно да ја отстранат Кук и ги удвојуваат напорите тоа да го направат, според лица запознаени со ова прашање.

Трамп во четвртокот за „Си-ен-би-си“ (CNBC) дека одлуката на судот се заснова на процедура, а не на суштината, и дека неговата администрација ќе го започне процесот за нејзино отстранување од централната банка.

„Ќе го започнеме процесот и ќе спроведеме совршен процес и совршена процедура“, рече тој.

Администрацијата, исто така, се фокусира на испразнетото место на чело на Федералните резерви во Атланта како уште една можност да оствари влијание врз централната банка, при што министерот за финансии Скот Бесент ја користи својата мрежа на контакти во потрага по потенцијални кандидати, рекоа упатените лица. Местото претседател на Федералните резерви во Атланта се смета за клучна функција во тимот за економска политика на Доналд Трамп поради внимателно следените анализи што таа институција ги спроведува за економскиот раст и други теми, наведоа изворите.

Претседателот на Федералните резерви во Атланта, исто така, ќе гласа за каматните стапки во 2027 година.

Трамп го засили притисокот врз Федералните резерви по враќањето на функцијата минатата година, често критикувајќи го Пауел затоа што не ги намалувал каматните стапки доволно брзо. Трамп јавно ја разгледуваше можноста за разрешување на поранешниот претседател и јасно стави до знаење дека ќе избере наследник кој е повеќе усогласен со неговото економско размислување. Неговиот конечен избор, сегашниот претседател на Федералните резерви Кевин Ворш, изгледаше како да го дели мислењето на Трамп дека каматните стапки треба да бидат пониски пред неговото именување.

Меѓутоа, намалувањето на каматните стапки на Федералните резерви оваа година изгледа сè помалку веројатно поради повторните инфлаторни притисоци. Околу половина од функционерите сега сметаат дека Фед годинава можеби ќе мора да ги зголемат каматните стапки, според проекциите објавени во јуни. Неколку претседатели на регионалните банки на Федералните резерви се меѓу креаторите на политиките кои се најзагрижени поради изгледите за инфлацијата.

Портпаролот на Белата куќа, Куш Десаи, не ги коментираше директно наводите од овој текст.

„Претседателот Трамп и функционерите на администрацијата доследно го велат истото: сите имаат доверба во претседателот Кевин Ворш и, и покрај привремените нарушувања на енергетските пазари, политиките на администрацијата на Трамп насочени кон понудата ја намалуваат инфлацијата за да го отворат патот за намалување на каматните стапки“, рече Десаи. Министерството за финансии не одговори на барањето за коментар.

Пауел останува

Трамп и понатаму е лут на Пауел затоа што останал во Одборот на гувернери на Федералните резерви по истекот на неговиот мандат како претседател, според повеќе лица блиски до претседателот. Трамп бил особено незадоволен кога Пауел кон крајот на мај ја прифатил наградата John F. Kennedy Profile in Courage Award за своето водење на Федералните резерви и го пофалил Конгресот затоа што мудро одлучил „да ги заштити одлуките за монетарната политика од политички притисок“.

Кевин Хасет, директор на Националниот економски совет на Белата куќа, јавно укажа на растечката загриженост во врска со Пауел и оваа недела ги засили критиките.

„Загрижен сум поради тоа што Пауел останува“, изјави тој во средата за „Фокс бизнис“. „Повеќето луѓе во Федералните резерви нема нужно да гласаат затоа што се патриоти, туку затоа што сакаат да му наштетат на Трамп и ќе мора внимателно да го следиме тоа.“

Претседателите на Фед кои заминуваат обично ја напуштаат централната банка по истекот на нивните раководни мандати, но Пауел ја задржа својата основна функција гувернер, која трае до 2028 година. Пауел рече дека ќе се држи настрана додека ја извршува таа функција, но како причина за останувањето ги наведе континуираните правни притисоци на администрацијата врз Федералните резерви.

Пауел ја донесе таа одлука откако Министерството за правда започна кривична истрага за неговото управување со реновирањето на седиштето на Федералните резерви во Вашингтон, вредно 2,5 милијарди долари, кое беше проследено со значително пречекорување на трошоците. Тој ја опиша истрагата како последица на тоа што Фед одбиле да ги определуваат каматните стапки во согласност со желбите на Трамп. Извештајот на генералниот инспектор на Федералните резерви за проектот за реновирање се очекува подоцна овој месец.

Иако американската обвинителка за Дистриктот Колумбија, Џанин Пиро, во април рече дека ја прекинува истрагата, таа наведе дека внимателно ќе ги анализира наодите на генералниот инспектор, јасно ставајќи до знаење дека истрагата би можела повторно да биде отворена.

Без разлика дали преку извештајот на генералниот инспектор или на некој друг начин, функционерите на Трамп и неговите сојузници се надеваат дека ќе најдат основа што ќе ѝ овозможи на Белата куќа да го отстрани Пауел, според лица запознаени со ова прашање.

Лиса Кук под лупа 

Лиса Кук, која беше именувана од Бајден, и понатаму е цел.

Трамп минатиот август презеде чекор со обид да ја разреши гувернерката на Федералните резерви кога рече дека ја отпушта Кук поради наводи за хипотекарна измама, кои таа ги негира. Случајот стигна до Врховниот суд откако Кук поднесе тужба за да го блокира разрешувањето, а мнозинството судии на Врховниот суд во понеделникот одлучија дека може да остане на функцијата додека не заврши основната постапка.

Во своето мислење, главниот судија Џон Робертс наведе дека судот донесува одлука на „тесна основа“ затоа што Трамп не ѝ овозможил на Лиса Кук соодветни процедури за да може да ги оспори обвиненијата против себе.

Речиси веднаш по одлуката, Трамп и неговите сојузници навестија дека имаат намера да продолжат со напорите да ја отстранат.

Врховниот суд не одлучуваше за тоа дали обвиненијата против Лиса Кук, доколку би биле точни, би претставувале доволна правна основа за нејзино разрешување од Федералните резерви. Тоа значи дека секој нареден обид на Трамп повторно да ја разреши би можел повторно да заврши пред судовите.

Федералните резерви во Атланта

Администрацијата, исто така, сè повеќе го насочува вниманието кон 12-те регионални банки на Федералните резерви, вклучително и испразнетото место во Атланта. Некои сојузници на Трамп сметаат дека тоа е можност да постават кандидат кој е идеолошки усогласен со претседателот, според лица запознаени со ова прашање.

Бесент и другите клучни економски функционери во администрацијата внимателно следат како се одвива процесот на избор на нов претседател.

Претседателите на регионалните банки на Федералните резерви, кои наизменично гласаат за одлуките за каматните стапки, ги избира нивниот локален одбор на директори, составен од извршни раководители и деловни лидери од регионот, со исклучок на членовите на финансиските институции. Кандидатите потоа ги одобрува Одборот на гувернери на Федералните резерви во Вашингтон.

Федералните резерви во Атланта беа во поодмината фаза од процесот на потрага по кандидат во мај, според лица запознаени со ова прашање. Меѓутоа, кога стана извесно дека наскоро ќе уследи потврдата на Кевин Ворш, потпретседателката на Федералните резерви за супервизија Мишел Боуман и тогашниот гувернер Стивен Миран, кои беа именувани од Трамп, ги повикаа функционерите да го запрат процесот додека Ворш не положи заклетва за да има одредено влијание врз изборот.

Процесот на избор неодамна повторно беше започнат. Ворш бара кандидати со искуство во раководење во приватниот сектор, според две лица запознаени со ова прашање.

Местото претседател на Фед Атланта остана испразнето откако поранешниот претседател Рафаел Бостик, кој често предупредуваше на долготрајните инфлаторни ризици, поднесе оставка во февруари, што го најави уште минатиот ноември.

Запрашан за коментар, огранокот на Федералните резерви во Атланта го повтори соопштението што го достави во јуни.

„Нашиот фокус останува на изборот на најдобриот кандидат кој ќе му служи на Шестиот округ, со зачувување на интегритетот на процесот“, рече Грег Хејл, претседател на одборот на директори на Федералните резерви во Атланта и на одборот за избор на претседател. „Ќе објавиме релевантни информации за оваа важна раководна функција кога за тоа ќе дојде соодветниот момент.“