text size
Едно лице загина, а најмалку 16 се повредени откако комбе влета во толпа луѓе за време на Парадата на гордоста во Берлин, во напад што германската влада го оцени како „грозоморен чин на насилство“.
Инцидентот се случил во саботата, непосредно пред 22 часот по локално време, по завршувањето на прославата по повод Кристофер Стрит Деј (Christopher Street Day), кога бело комбе со голема брзина влетало меѓу пешаците во паркот Тиргартен. Според германската полиција, возилото излегло од коловозот и навлегло на пешачката патека, при што прегазило повеќе лица. Дел од повредените се во критична состојба.
Полицијата соопшти дека идентификувала осомничен кој, според информациите на агенцијата „Франс прес“, е поврзан со исламистички кругови. Истрагата е во тек, а властите ги повикаа сведоците да достават фотографии, видеоснимки и други информации што би можеле да помогнат во расветлувањето на случајот.
По нападот, организаторите ја прекинаа целата програма на Парадата на гордоста. Прославата претходно собра стотици илјади учесници кои маршираа низ центарот на Берлин, од паркот Тиргартен до Бранденбуршката порта, каде што беше предвиден завршен концерт.
Германскиот канцелар Фридрих Мерц е информиран за случувањата, а федералната влада соопшти дека безбедносните служби ќе им пружат целосна поддршка на берлинските власти во истрагата. Во соопштението се наведува дека Мерц и министерот за внатрешни работи Александер Добринт ќе инсистираат нападот што побрзо да биде целосно расветлен и одговорните да бидат изведени пред правдата.
Иако безбедноста за време на манифестацијата била засилена, со голем број полицајци и физички бариери поставени за спречување вакви напади со возила, напаѓачот сепак успеал да стигне до пешачката зона.
Градоначалникот на Берлин, Кај Вегнер, го осуди нападот, оценувајќи дека станува збор за „напад врз нашето слободно и космополитско општество“.
„По мирната и достоинствена Парада на гордоста, собирот за толерантен и мирен Берлин беше брутално нападнат. Берлин е град на слободата, а денес таа слобода беше страшно нарушена“, напиша Вегнер на социјалната мрежа Х.
Кристофер Стрит Деј се одржува во чест на немирите во њујоршкиот „Стоунвол Ин“ во 1969 година, кои се сметаат за почеток на современото движење за правата на ЛГБТ+ заедницата.
.webp){kind=icon}
