Рускиот напад на Киев ја разоткри слабоста на украинската одбрана

Смртоносниот ноќен напад, извршен во пресрет на самитот на НАТО, ја истакна сѐ поголемата ранливост на Киев, во услови кога недостигот од американските системи за противвоздушна одбрана „патриот“ станува сѐ поизразен, а мировните преговори остануваат во застој.

Единаесет лица загинаа, а 60 беа повредени во ноќните напади врз Киев, кои предизвикаа разурнувања во неколку дела од градот и оштетија повеќе станбени згради, објави претседателот Володимир Зеленски на платформата Х во понеделникот. Уште три лица загинаа во поширокиот регион околу главниот град, соопшти министерот за внатрешни работи Игор Клименко на Телеграм.

Украина не успеала да собори ниту една од 23-те балистички ракети „искандер-М“, ниту шесте суперсонични ракети „циркон“ и „оникс“ што ги лансирала Русија, според извештајот на украинските воздухопловни сили објавен на Телеграм. Поголем успех бил постигнат против крстосувачките ракети, кои летаат со помала брзина.

„Сѐ додека ракетите за системите ‘патриот’ остануваат како резерва кај нашите сојузници, Русија само ќе биде охрабрена да продолжи да ги ‘уништува’ станбените згради“, напиша Зеленски. „Соединетите Американски Држави и Европа имаат доволно сила да го запрат овој терор.“

Нападот следуваше само неколку дена откако 30 лица загинаа, а речиси 100 беа повредени во најсмртоносниот руски ракетен и напад со беспилотни летала врз Киев во последната година.

Претходно Украина пресретнуваше околу една третина од балистичките ракети истрелани за време на големите руски напади, а понекогаш и повеќе. Тој процент падна под 20 проценти за време на минатонеделниот напад врз Киев, пред целосно да падне на нула во четвртокот, што го нагласи сѐ поголемиот недостиг од пресретнувачки ракети PAC-3 (ПАК-3) за американските системи „патриот“ - единственото средство во украинскиот арсенал што сигурно може да се спротивстави на балистички закани.

„Кога станува збор за балистичките ракети, ситуацијата и натаму не е многу охрабрувачка“, изјави портпаролот на украинските воздухопловни сили Јуриј Игнат за телевизијата „1+1“ во понеделникот. „Русите очигледно го користат фактот што постои сериозен недостиг и од ракетите PAC-2 и PAC-3, како во Украина така и во светот, па затоа се концентрираат на балистички напади.“

Постојаниот недостиг од пресретнувачки ракети во Украина може да ја поттикне Русија уште повеќе да го зголеми производството на балистички ракети, иако нивното производство трае подолго и е покомплицирано отколку кај крстосувачките ракети, рече Игнат. Тој додаде дека најголемиот дел од разурнувањата во главниот град во текот на ноќта биле предизвикани токму од руските балистички ракети.

Зеленски се очекува повторно да побара од Вашингтон да помогне со испорака на неопходното оружје кога ќе се сретне со американскиот претседател Доналд Трамп во Анкара, за време на самитот на Северноатлантската алијанса (НАТО), кој започнува во вторник.

Причината за драстичниот пад на успешноста во пресретнувањето на руските балистички ракети е недоволната испорака на пресретнувачки ракети, напиша Зеленски на Х во понеделникот. Тој оцени дека е од клучно значење САД и европските партнери од самитот на НАТО во Анкара да излезат со силни одлуки за поддршка на украинската противвоздушна одбрана.

Европските лидери, кои Трамп ги обвини дека даваат само млака поддршка во неговата војна со Иран, повикаа на обновени напори за започнување мировни преговори меѓу Русија и Украина.

Рускиот претседател Владимир Путин и Доналд Трамп во саботата разговараа телефонски за Украина и претстојниот самит на НАТО. Американскиот претседател разговарал и со Зеленски, при што двајцата лидери разговарале за состојбата на фронтот, како и за дипломатските напори за завршување на војната, која сега влегува во својата петта година.