Трамп вети дивиденда: По 5.000 долари за секој гласач ако републиканците победат на избори

Со месеци претседателот Доналд Трамп вели дека загриженоста е измама и дека неговата економија е во процут.

Анкетите покажуваат дека Американците не се убедени. Затоа, соочен со опаѓачка популарност и намален ентузијазам, претседателот им понуди на гласачите договор: изберете ги републиканците и добијте исплата од 5.000 долари.

Објавувајќи го ова во говор во средата на конвенција на Републиканската партија за претстојните избори, во Далас Трамп не понуди никакви детали, а малку е веројатно дека предлогот ќе стане закон. Сопартијците републиканци веќе го отфрлија неговиот претходен повик за исплата на дивиденди од приходите од царините, а Конгресот ќе треба да одобри програма за парични исплати со цена што би била далеку над билион долари.

„Ќе се вика Трампова дивиденда“, рече претседателот. „Сега сè што треба да направиме е да победиме.“

Јавниот долг на САД, кој во последните недели за првпат ја надмина сумата од 40 билиони долари, веќе ги зголемува трошоците за задолжување. Фјучерсите на американските државни обврзници беа стабилни по изјавите на претседателот, што сигнализира дека трговците со обврзници гледаат мала веројатност дивидендата да стане реалност.

Спектаклот, кој беше проследен со слични нереални ветувања неговите даночни намалувања да ги направи трајни и да ги укине провизиите за користење платежни картички, го нагласи очајот што се вовлекува во реториката на Трамп додека се соочува со пораз на претстојните избори што би го турнале во статус на немоќ и би отвориле порој од конгресни истраги за постапките на неговата администрација и неговото семејство.

Сојузниците на Трамп веќе се обидуваа да го изменат неговиот план. Републиканскиот сенатор од Тексас, Тед Круз, рече дека очекува законодавците да разговараат за влијанието врз дефицитот и сугерираше дека би било подобро да биде структуриран како даночен поврат со услови поврзани со работата.

Што велат стратезите на „Блумберг“...

„Општата реакција на пазарите е многу воздржана токму затоа што сите гледаат речиси нула шанси да се случи тоа. Американската економија е силна и веќе е изложена на ризик од прегревање, па вшприцувањето толку голем дополнителен фискален стимул во услови на притисок врз финансирањето ќе ги влоши сите динамики на кои веќе сме фокусирани на пазарите: послаби државни обврзници, депрецијација на доларот и трка кон суровини и реални средства.“

- Марк Кадмор, извршен уредник на „Маркетс лајв“. 

Во обраќање во ударниот термин, кое траеше повеќе од 100 минути, претседателот ги молеше гласачите да се преправаат дека тој е на гласачкото ливче на претстојните избори, надевајќи се дека ќе ги мотивира независните гласачи и гласачите со мала веројатност за излегување, кои беа клучни за неговите две претседателски победи.

„Вашиот глас ќе одлучи дали нашата земја ќе се сопне на прагот од следните 250 години или ќе тргне напред и никогаш, ама баш никогаш, нема да погледне назад“, рече Трамп од сцената во ААЦ (American Airlines Center).

Но електоратот во голема мера е лут поради раководењето на Трамп со економијата и војната во Иран. Многу републиканци што се кандидираат во тешки изборни трки го прескокнаа дводневниот собир во Тексас. Празни места беа видливи додека Трамп го одржуваше своето обраќање, кое се емитуваше во исто време со натпреварот со кој започна сезоната во Националната фудбалска лига.

„Најголемата обврска во американската политика во моментов е Доналд Трамп - и тој штотуку го докажа тоа“, наведе во соопштение претседателот на Демократскиот национален комитет, Кен Мартин.

„Републиканците сега треба да го прикажат неговиот катастрофален, несмасен говор во подобро светло, иако е јасно дека оваа бизарна претстава се одржува за да се задоволи кревкото его на Трамп. Вечерва беше очајнички обид на републиканците да ја игнорираат реалноста дека сите нивни ранливи кандидати се на пат да загубат во ноември“, се наведува во соопштението.