Основното јавно обвинителство (ОЈО) за гонење на организиран криминал и корупција денеска поднесе обвинение против поранешниот Генерален секретар на Владата, Мухамед Зекири.
Тој се товари за злоупотреба на службената положба, односно дека спротивно на Законот и без спроведена постапка за јавна набавка склучил два договора за консултантски услуги за Пошта и Железници Транспорт вредни скоро 1,5 милиони евра.
Како што посочуваат од ОЈО, во периодот од април 2021 до март 2022 година, искористувајќи ја својата положба, Зекири постапил спротивно на одредбите од Законот за јавни набавки и во два наврата, без спроведување на соодветна постапка за јавна набавка, склучил два договора со две правни лица како даватели на услуги.
„На 04. мај 2021 година, обвинетиот, без да спроведе постапка за јавна набавка, со умисла потпомогнат од осомничените хрватски државјани, недостапни на органите на прогонот, склучил договор за консултантски услуги со правно лице на износ од 795.000 евра, без ДДВ, во денарска противвредност. Ова правно лице, во кое еден од осомничените хрватски државјани е соосновач и управител, било основано дваесет дена пред склучувањето на Договорот. По склучениот договор, правното лице склучило Договор за консултантски услуги за постапка на процена на вредноста, како и длабинско снимање на АД Пошта на Северна Македонија Скопје со вториот осомничен хрватски државјанин, за износ од 130.000 евра во денарска противвредност. Во критичниот период, во повеќе наврати од сметката на Владата на РСМ се исплаќани парични средства на сметката на правното лице, со што за правното лице е прибавена значителна противправна имотна корист во вкупен износ од 57.932.100 денари, што го претставува износот согласно договорот зголемен за 18 отсто ДДВ“, се наведува во соопштението на Обвинителството.
Вториот договор за консултантски услуги бил за поддршка во процесот на потенцијална приватизација на Железници Транспорт АД Скопје и бил склучен наредниот месец, односно на 23. јуни 2021 година.
„Договорот со друго правно лице како давател на услуги (консултант) бил со вкупна вредност во износ од 772.400 евра во денарска противвредност, без пресметан ДДВ. На сметка на ова правно лице Владата на РСМ врз основа на издадена фактура првично исплатила аванс од 11.284.162 денари за одржување на почетен состанок со правното лице, односно за официјално започнување на проектот, а потоа врз основа на уште четири фактури биле исплатени буџетски средства во износ од 26.247.138 денари“.
Со опишаните дејствија Зекири прибавил противправна имотна корист од значителна вредност за двете правни лица во вкупен износ од 89.385.255 денари (1.442.101 евра), за колку и го оштетил државниот буџет.
Предметниот обвинител на судот му предложил продолжување на мерката куќен притвор за поранешниот Генерален секретар на Владата.
.webp){kind=icon}