Енергетската криза не е скапа само за домаќинствата и бизнисите во Јапонија. Зголемените сметки за струја ги оптоваруваат и чуварите на самурајските мечеви на нацијата, древните свитоци и другите уметнички и национални богатства.
Националниот музеј во Токио, кој се смета за најстара и најголема ваква институција во Јапонија, очекува двојно повисоки комунални трошоци оваа година, се вели во написот од директорот на музејот, Макото Фуџивара, за списанието „Бунгеј шунџу“. Трошоците се клучни за заштита на 120.000 непроценливи предмети на музејот од Јапонија и другите делови на Азија.
„Културните артефакти треба да се чуваат во складишта со соодветна температура и влажност, за да се обезбеди дека ќе останат во добра состојба. Институцијата мора да ги намали купувањето и поправките на културните добра за да врзе крај со крај оваа година“, напиша Фуџивара.
Музејот е најновата жртва на недостиг од енергија, што минатата година предизвика рекорден раст на цените на природниот гас и јагленот. Јапонските сметки за струја воопшто не се исклучок.
Националниот музеј во Токио управува со 89 национални богатства, артефакти означени од владата поради нивната вредност на глобално ниво. Делата вклучуваат античко ритуално ѕвоно од периодот меѓу вториот и првиот век пр. н.е., насликан преклопен параван од периодот едо (17-19 век), кој прикажува сцени од Кјото, како и миказуки мунечика, кој се смета за едно од најголемите сечила во Јапонија. Музејот, исто така, одржува повеќе од 600 артефакти означени како важни културни добра.
Музејот очекува комуналните трошоци да се искачат на околу 3,4 милиони долари за фискалната година што завршува во март, што е повеќе од двојно од буџетот издвоен за потребите на електрична енергија и гас.
Фуџивара напиша дека иако минатата есен побарале корекции на парите што ги имаат на располагање, тоа не било одобрено.
.webp){kind=icon}
Во моментов нема коментари за веста. Биди прв да коментира...