.webp){kind=icon}
Мора да се посвети поголемо внимание на улогата што ја игра загадувањето во ширењето на бактериите отпорни на антибиотици, познати како супербактерии, за да се елиминира закана од различни пандемии, се вели во новиот извештај на Обединетите нации (ОН).
Антимикробната отпорност се јавува кога бактериите, вирусите или другите заразни организми развиваат отпорност на лекови. Бактериите може да станат отпорни откако ќе дојдат во контакт со контаминирана вода или земја. Извештајот на ОН нагласува три индустрии, фармацевтската индустрија, земјоделството и здравствената заштита, за улогите што ги играат во емисијата на штетни загадувачи што помагаат во развојот на антимикробната отпорност.
„Сериозен пристап кон антимикробната отпорност значи да се спречи загадувањето на животната средина. Ограничувањето на испуштањето на антимикробниот отпад во животната средина е важно за секого, затоа што секој сектор е виновен за додавање на товарот на антимикробната отпорност“, рече Ингер Андерсен, извршен директор на Програмата на Обединетите нации за животна средина.
Меѓу препораките, извештајот повикува фармацевтските компании да ги унапредат производствените процеси на тој начин што ќе го намалат истекувањето од производите, земјоделците да избегнуваат употреба на одредени антибиотици, а болниците да размислат за третман на антимикробни загадувачи во отпадните води на самото место.
Според процените наведени во извештајот, до 2050 година антимикробната отпорност може да биде одговорна за до 10 милиони смртни случаи секоја година.
Друга студија на Светската банка во 2017 година покажа дека проблемот може да доведе до тоа светот да загуби повеќе од три илјади милијарди долари од својот годишен БДП до 2030 година. Извештајот на ОН ги нагласува неодамнешните студии што покажуваат поврзаност помеѓу зголемувањето на антимикробната отпорност со климатските промени и губењето на биолошката разновидност. Факторите што се движат од концентрацијата на јаглерод диоксид во воздухот до промените во разновидноста на почвата потенцијално влијаат на тоа како се шири отпорноста на антибиотици.
„Се разви значителен напредок во врска со антимикробната отпорност. Инвестициите во нови и достапни антимикробни средства и други превентивни мерки треба да се зголемуваат, но мора да го запреме загадувањето на изворите за да обезбедиме ова супероружје да ја задржи својата моќ“, рече Андерсен.
Извештајот, исто така, забележува дека земјите со пониски приходи се меѓу најпогодените од антимикробната отпорност поради нивната сиромаштија, недостигот од санитарни услови, лошата хигиена и загадувањето. „Ова значи дека проблемот може ефективно да се реши само со решенија што би можеле да влијаат на посиромашните заедници“, смета Џејсон Бурнам, асистент на професор за заразни болести на Медицинскиот факултет на универзитетот „Вашингтон“ во Сент Луис.
„Начинот на кој се спроведуваат мерките е важен во глобален контекст за да се осигури дека маргинализираните заедници нема да страдаат“, рече тој.
