Двата силни земјотреса во кои досега се знае дека загинаа над 24.000 луѓе во Турција се очекува да резултираат со загуба за економијата на нацијата од над 84 милијарди долари, или околу 10 проценти од бруто-домашниот производ (БДП), според процените на една деловна групација.
Се предвидува дека земјотресите со јачина од 7,7 и 7,6 степени, кои најмногу ги погодија Турција и Сирија на 6 февруари, ќе предизвикаат штета од околу 70,8 милијарди долари на станбени згради во Турција и дополнителни 10,4 милијарди долари загуба во националниот приход, соопшти турската конфедерација на претпријатија и бизниси.
Групата, попозната како „Турконфед“, рече дека загубите на работната сила ќе ја чинат турската економија 2,9 милијарди долари. Земјотресите сериозно погодија 10 провинции и 13,5 милиони луѓе во југоисточниот дел на земјата, како и во соседна Сирија.
Пресметките на „Турконфед“ се засноваа на земјотресите во 1999 година во близината на Истанбул, во кои загинаа околу 18.000 луѓе. Бројот во последното уништување е далеку над тој од земјотресот во 1999 година, а уште илјадници лица се водат како исчезнати.
Процената е, исто така, поголема од тоа што досега го пресметале другите економисти, иако многумина од нив, вклучувајќи го и „Барклис“ (Barclays Plc), истакнаа дека е премногу рано да се процени целосното влијание.
Штетата на турската инфраструктура, вклучувајќи ги и патиштата и електричните мрежи, како и болниците и училиштата, може да го зголеми буџетскиот дефицит на нацијата над 5,4 отсто од БДП оваа година, наспроти официјалната прогноза од 3,5 отсто, се вели во извештајот.
Првичните пресметки на „Блумберг економикс“ (Bloomberg Economics) покажаа дека трошоците поврзани со катастрофи, вклучувајќи ги и напорите за обнова, може да сочинуваат околу 5,5 отсто од БДП.
Претседателот Реџеп Таип Ердоган рече дека неговата влада ќе ги изгради становите во рок од една година, а првично како помош при катастрофи беа доделени околу 100 милијарди лири (5,3 милијарди долари).
.webp){kind=icon}
