Европската Унија ќе се приклучи на меѓународните напори да процени дали големи интервенции, како што се одбивањето на сончевите зраци или менувањето на временските шеми на Земјата, се остварливи опции за борба против климатските промени.
Блокот в среда ќе објави рамка за процена на безбедносните импликации врз планетата, која брзо се затоплува, како што е потенцијалот ограничените извори на вода или храна да предизвикаат конфликти и миграција, се наведува во нацрт-документот во кој „Блумберг“ имал увид. Дел од таа процена вклучува проучување на потенцијалните опасности од реинженеринг на атмосферата.
„Овие технологии внесуваат нови ризици за луѓето и екосистемите, а исто така би можеле да ја зголемат нерамнотежата во моќта меѓу нациите, да предизвикаат конфликти и да отворат огромен број етички, правни и политички прашања“, се наведува во документот, кој може да биде подложен на промени.
Започнувањето на ова истражување ја турка ЕУ во дебата за тоа дали таканаречениот климатски геоинженеринг е добра наука или само научнофантастично одвлекување на вниманието, со потенцијално опасни импликации за планетата и нејзината атмосфера. Блокот би сакал да види меѓународни дискусии за креирање правила за новосоздадениот сектор.
„ЕУ ќе ги поддржи меѓународните напори за сеопфатна процена на ризиците и несигурноста од климатските интервенции, вклучувајќи ја и модификацијата на сончевото зрачење“, се наведува во документот.
Ваквите големи интервенции се појавија заедно со научниот напредок и зголемената загриженост дека нациите ќе ја пречекорат целта за ограничување на глобалното затоплување на 1,5 Целзиусов степен. Потенцијалните опции вклучуваат вшприцување аеросол во стратосфера, што подразбира зголемување на концентрацијата на честички за да се намали количеството на сончева светлина што стигнува до површината на Земјата.
Критичарите велат дека ваквите напори, во најдобар случај, го одвлекуваат вниманието од решавањето на примарниот предизвикувач на глобалното затоплување: зголемувањето на емисиите. Во најлош случај, овие масивни интервенции може да имаат непредвидени несакани ефекти, како што е менување на виталните процеси на дожд, предупредуваат тие.
Некои научници повикаа на меѓународен договор за отфрлање на идејата за такви решенија.
.webp){kind=icon}
Во моментов нема коментари за веста. Биди прв да коментира...