Штрајкот на контролорите на летање што беше најавен за денеска е одложен и ќе нема прекини на летовите на аеродромите во Скопје и во Охрид, ниту пак редуцирање на опслужувањето на прелетите, информираа вчера вечерта од Министерството за транспорт и врски и Струковиот синдикат на контролорите на летање.
Договорот за одложување на штрајкот е постигнат на средба што ја одржаа вчера попладне министерот за транспорт и врски Благој Бочварски и раководствата на ССКЛ и на Македонската навигација (М-НАВ).
Претседателот на ССКЛ, Александар Тасевски, за МИА изјави дека добиле уверување за исполнување на поставените барања, со гаранција за нивна реализација од министерот Бочварски.
„Постигнат е договор да се одложи штрајкот, барањата ги оценија како легитимни, а како гарант за нивната реализација стојат министерот Бочварски и неговиот кабинет. Договорено е да има постојана координација и средби во наредниот период за да се спроведат“, изјави Тасевски.
Средбата во Министерството за транспорт и врски/МИА
Од Министерството за транспорт во соопштение информираа дека на средбата е постигнат договор за согласност за решавање на барањата што беа отворени од страна на Струковиот синдикат на контролорите на летање во Македонската навигација.
„Го поздравуваме потпишувањето на колективниот договор и одлуката за ангажирање консултантска фирма што професионално ќе изврши функционална анализа за подобрување на функционирањето на претпријатието. Продолжуваме со заеднички координации да работиме за целосно реализирање на преземените обврски од двете страни. Се согласивме да работиме на издигање на нивото на транспарентноста за сите прашања, сè до изработката на студијата што ќе ги даде идните правци за развој на претпријатието. Со ова ја информираме јавноста дека штрајкот ќе биде одложен, за давање простор за надминување на отворените прашања. Министерството за транспорт и врски заедно со менаџментот на М-НАВ стои на ставот за спроведување на барањата на синдикатот“, се наведува во соопштението.
Средбата во Министерството за транспорт се одржа во пресрет на штрајкот што синдикатот го најави за денеска од 11 до 17 часот, период во кој требаше да бидат прекинати полетувањата и слетувањата на Меѓународниот аеродром Скопје и на аеродромот „Св. Апостол Павле“ во Охрид, а услугите за прелетите над македонското небо да бидат намалени за половина од редовните.
Откако синдикатот го најави штрајкот поради, како што информираше, „непрофесионално однесување од директорите во однос на вработувањата и внатрешните прераспоредувања, несоодветните услови за работа и опрема“, од М-НАВ ги отфрлија тврдењата и завчера одржаа средба, но без позитивен исход, по што следуваше поканата за состанок во ресорното министерство.
Клучните барања на синдикатот се во однос на постапките за вработување. Тие бараат да нема вработувања на друг кадар освен контролори на летање и инженери и техничари сè додека не се направи нова систематизација што ќе биде базирана на резултатите од студијата што ќе ја подготви консултантска фирма, за што се потребни пет-шест месеци.
.webp){kind=icon}
Во моментов нема коментари за веста. Биди прв да коментира...