Најбогатиот човек во Русија, Владимир Потанин, го постави спорот со неговата поранешна сопруга пред највисокиот суд во Велика Британија во обид да избегне едно од најголемите барања по развод во светот, додека воедно предупреди и на „дарежливоста“ на англиските судови.
Адвокатите на санкционираниот милијардер побараа од судиите на Врховниот суд во вторникот да ја поништат претходната пресуда со која ѝ се отвори патот на Наталија Потанина да го обнови своето барање за повеќе милијарди долари во Лондон. Потанин има нето вредност од 29,3 милијарди долари, според индексот на милијардери на „Блумберг“.
Случајот ќе биде своевиден тест за британските закони кои доведоа до тоа Лондон да биде нарекуван светска престолнина за разводи, бидејќи судиите имаат тенденција да се залагаат за еднаква поделба на имотот меѓу сопружниците. Адвокатите на Потанина во 2019 година процениле дека големината на нејзиното побарување потенцијално би можела да изнесува 9 милијарди долари.
Англиските судови „се познати по својата великодушност“ во нивниот пристап кон случаите на развод, рече адвокатот на Потанин, Едвард Фолкс во судот.
Во Британија, најголемата јавно позната судска награда за развод моментално е 450 милиони фунти за сопругата на милијардерот Фархад Ахмедов - иако двајцата се спогодија за исплата на помалку од една третина од таа сума.
Судиите претходно рекоа дека Потанина добила „блага награда“ во претходната постапка за развод во Русија, со оглед на богатството на милијардерот и должината на нивниот 31-годишен брак.
Случајот одеше напред-назад со одлука на понискиот суд во која се обвинува Потанина за „разводен туризам“ пред таа да ја добие жалбата. Двајцата живееле во Русија во текот на нивниот брак пред Потанина да купи дом во Вестминстер во 2014 година. Потанина бара 50 отсто од вредноста на својот удел во „Норилск Никел“ (MMC Norilsk Nickel PJSC), заедно со дивиденди. Таа сума за многу ќе надмине пет милијарди долари, со оглед на тоа што Потанин поседува околу една третина од акциите во производителот на метали.
Потанина рече дека добила околу 40 милиони долари по руската постапка за развод, додека Потанин рече дека поранешната сопруга се стекнала со 84 милиони долари.
„Трошоците и доцнењето во овој случај беа неверојатни без суштински напредок“, велат адвокатите на Потанина. До јануари 2022 година, Потанин потрошил околу 8,4 милиони фунти (10,2 милиони долари), додека неговата поранешна сопруга потрошила 1,4 милиони фунти за правни трошоци.
Потанин ги искористи ограничувањата на странската сопственост врз руски средства откако Кремљ ја нападна Украина со разгранување во финансии и купување удели во банки додека странските сопственици се повлекуваа. Потанин беше санкциониран од Британија откако купи удел во „Росбанк“ (Rosbank PJSC). Тој беше ставен и на црната листа на САД на крајот на минатата година. Пред тоа, Потанин во голема мера ги избегнуваше западните санкции што ги погодија другите членови на руската елита.
.webp){kind=icon}
Во моментов нема коментари за веста. Биди прв да коментира...