Истражувањата сугерираат дека заклучувањата и ограничувањата за време на пандемијата имале „трајни ефекти“ врз здравјето на мозокот на луѓето на возраст над 50 години.
Студијата покажа дека когнитивната функција и работната меморија кај постарите лица брзо се намалуваат за време на пандемијата, без оглед на тоа дали биле заразени со болеста ковид-19. Истражувачите тврдат дека тоа може да се должи на голем број фактори што се влошиле за време на пандемијата, вклучувајќи недоволна физичка активност, консумирање алкохол, чувство на осаменост и депресија, пишува „Дпа“.
Тим истражувачи од Универзитетот во Ексетер, Велика Британија, и од Институтот за психијатрија, психологија и невронаука на Кралскиот колеџ во Лондон ги анализираа резултатите од тестовите за функцијата на мозокот извршени на 3.142 учесници во студијата „Протект“.
Bloomberg
Студијата, која започна во 2014 година, даде увид во здравјето на мозокот на луѓето постари од 40 години во период од 25 години. Учесниците биле на возраст меѓу 50 и 90 години и живееле во Велика Британија.
Истражувачите ги споредија податоците помеѓу март 2019 и февруари 2020 година со податоците собрани во текот на првата година од пандемијата (од март 2020 до февруари 2021 година) и втората година од пандемијата (од март 2021 до февруари 2022 година). Анализата покажа дека стапката на когнитивно опаѓање се забрза во текот на првата година од пандемијата и беше поизразена кај луѓето што веќе покажаа мал когнитивен пад пред почетокот на ковид. Тој тренд продолжи и во втората година од пандемијата, што укажува на тоа дека затворањата и ограничувањата имале долготрајни ефекти.
„Нашите наоди сугерираат дека заклучувањето и другите ограничувања што ги доживеавме за време на пандемијата навистина имаат долгорочни ефекти врз здравјето на мозокот кај луѓето на возраст од 50 и повеќе години, дури и по завршувањето на заклучувањето. Тоа го отвора важното прашање дали луѓето се потенцијално изложени на ризик од когнитивно опаѓање што може да доведе до деменција“, вели Ен Корбет, професор по истражување за деменција и водач на студијата „Протект“ на Универзитетот во Ексетер.
.webp){kind=icon}
