Потпишан е меморандум за соработка за воспоставување брза пруга меѓу Македонија и Србија како дел од железничкиот коридор 10.
Меморандумот во Владата на Република Србија го потпишаа министерот за транспорт и врски Благој Бочварски и српскиот министер за градежништво, сообраќај и инфраструктура Горан Весиќ, во присуство на премиерот Димитар Ковачевски и неговата српска колешка Ана Брнабиќ.
Во следниот период треба да се формира работна група што ќе треба да го дефинира акцискиот план по кој ќе се работи.
На македонска територија во првата фаза треба да бидат изградени 50 километри, а намерата е коридорот 10 да биде целосно изграден, до Солун и Атина. Брзината на пругата ќе биде најмалку 160 километри на час.
Потпишување на меморандумот за соработка
МИА
„Нашата посветеност за соработка со сите држави од регионот има бенефиции за граѓаните и за компаниите. Ние немаме толку силни економии како земјите од Европската Унија и затоа е важно да соработуваме, затоа што силата е во заедништвото. Наш фокус мора да остане Европската Унија, бидејќи државите од регионот таму и припаѓаат“, рече Ковачевски на прес-конференцијата по потпишувањето на меморандумот.
Според српската премиерка Брнабиќ, со денешното потпишување на меморандумот се трасира патот за идниот развој на односите меѓу двете држави. Од српска страна е завршена брзата пруга од Белград до Нови Сад, а до крајот на 2024 година е планирано да се заврши и делот до Суботица, така што ќе биде завршен целиот дел до Унгарија.
„Очекуваме до крајот на 2025 година и Унгарија да ја заврши делницата од Будимпешта до Суботица. Продолжуваме да вложуваме во железничкиот коридор 10, со модернизација на пругата од Белград до Ниш. Нашиот план беше и од Ниш до Прешево, но во последните неколку месеци почнавме да разговараме и за делница до Скопје и денес веќе потпишуваме меморандум“, рече Брнабиќ.
.webp){kind=icon}