.webp){kind=icon}
Австралија ги паузираше апликациите за поединци што инвестираат повеќе од 5 милиони австралиски долари (3,3 милиони американски долари) во земјата, како дел од пошироката ревизија на имиграциската политика креирана да привлече поквалификувани мигранти.
Сите апликации за значајни инвеститори или програмата „златна виза“ се стопирани. Министерката за внатрешни работи Клер О’Нил рече дека визата е еден од „многуте аспекти“ на миграцискиот систем на Австралија што владата планира да го промени за „да создаде систем што е корисен за земјата“.
Визите за инвеститори слични како тие во Австралија се соочија со критики низ светот поради обвинувањата дека биле злоупотребени од богати поединци и не им користеле на самите земји. Главниот проблем е што парите често одат во недвижен имот или финансиски средства, наместо во продуктивни области на економијата.
„Со години е очигледно дека оваа виза не го обезбедува она што на нашата земја и економија им треба од системот за миграција“, наведе О’Нил во изјавата.
Лабуристичката влада од левиот центар во Австралија откри нова стратегија за имиграција во декември, дизајнирана да ги намали новите пристигнувања на нивоата од пред пандемијата на ковид. Меѓу одредбите во стратегијата беа сузбивање на злоупотребата на студентските визи и поголемо целење на квалификувани мигранти за да се пополнат растечките празнини во економијата.
Австралија забележа исклучително силна имиграција во годината до јуни 2023-та, со повеќе од 500.000 луѓе што влегле во земјата во период од 12 месеци.
Австралискиот печат во понеделникот објави дека „златните визи“ ќе бидат укинати. О'Нил ги најави плановите за ревизија на визата во 2022 година, велејќи дека гледа малку причини да ги задржи специјалните поставки за имиграција за богатите мигранти.
„Тоа всушност нè чини во просек за секој човек, бидејќи тоа се луѓе што обично доаѓаат во доста доцна фаза од нивниот живот, често на крајот на нивната работна кариера, и доаѓаат во Австралија во основа за да се смират и да се пензионираат“, изјави тогаш таа.
Визата за значајни инвеститори исто така беше критикувана од австралискиот институт „Гратан“ (Grattan Institute). Извештај во септември 2022 година покажа дека обезбедува мал даночен приход за австралиската влада, додека ја чини економијата големи суми за услугите за новодојденците.
