Израел соопшти дека во Газа загинале 21 војник, најголем број во еден ден

Израелските власти соопштија дека во понеделникот во Газа биле убиени 21 војник, што е најголем број на загинати во еден ден за војската од почетокот на војната против Хамас во октомври.

Околу 16 часот по локално време во централна Газа, милитанти пукаа врз израелски тенк, а во исто време имаше големи експлозии во две згради во близината, изјави во вторникот портпаролот на израелските одбранбени сили.

„Зградите се урнаа како резултат на оваа експлозија, додека повеќето војници беа внатре и околу зградите“, посочи портпаролот. „Зградите најверојатно експлодирале од муницијата што нашите сили ја поставија таму за да ги минираат објектите и терористичката инфраструктура во областа“.

Израелските сили напредуваат подлабоко во јужните и централните делови на Газа, а борбите и натаму се интензивни. Според војската, околу 200 израелски војници биле убиени во Газа пред последниот инцидент.

Израел се соочува со зголемен меѓународен притисок да ги прекине борбите и да постигне дипломатски договор со Хамас - прогласен за терористичка организација од САД и од Европската Унија - за ослободување на повеќе од 100 заложници, кои сè уште ги држи групата.

Премиерот Бенјамин Нетанјаху рече дека војната ќе продолжи сè додека не биде уништен Хамас и не бидат ослободени сите заробеници. Тој рече дека најдобриот начин да се постигне последната цел е да се продолжи да се врши воен притисок врз Хамас.

Групата уби околу 1.200 луѓе кога нејзините милитанти го нападнаа јужниот дел на Израел на 7 октомври. Во одмаздничките бомбардирања на Израел и во копнениот напад загинаа повеќе од 25.000 луѓе.