Нови американски жртви во војната со Иран и значаен раст на цената на нафтата

Воениот судир меѓу САД и Иран продолжува да се интензивира со нов бран меѓусебни напади, при што американската војска соопшти дека деветта ноќ по ред извршила воздушни удари врз ирански воени цели. Истовремено, бројот на загинати американски војници се зголемува, а тензиите во Ормускиот Теснец дополнително ја разгоруваат загриженоста за безбедноста на глобалното снабдување со енергенти.

Според американската Централна команда (CENTCOM), најновите напади биле насочени кон командни центри, поморски капацитети, лансирни позиции за ракети и беспилотни летала, како и комуникациска инфраструктура на Иран. Од американската војска наведуваат дека операцијата има цел дополнително да ги ослаби иранските способности за напади врз трговски бродови и цивилни пловни објекти кои минуваат низ Ормускиот Теснец - еден од најважните светски поморски енергетски коридори.

Во меѓувреме, американската армија потврди дека уште еден припадник на вооружените сили загинал во северен Ирак при обид за контролирано уништување на неексплодирано иранско беспилотно летало. Во истиот инцидент еден војник е повреден. Само еден ден претходно, двајца американски војници загинаа во Јордан во напад што Вашингтон го припишува на Иранската револуционерна гарда.

Со најновата жртва, вкупниот број загинати американски воени лица од почетокот на американско-израелската воена кампања против Иран на 28 февруари достигна 17. Американските власти соопштија дека во Јордан биле пронајдени и неидентификувани човечки останки, при што се проверува дали станува збор за претходно исчезнат американски војник.

Американскиот претседател Доналд Трамп изјави дека последните воздушни напади биле извршени во чест на загинатите американски војници, нагласувајќи дека тие „се бореле за Иран да не поседува нуклеарно оружје“. Тој истакна дека американските сили повторно силно ги погодиле иранските цели.

По повеќе од една недела интензивни напади од двете страни, конфликтот повеќе не е ограничен само на воени објекти. Во нападите сè почесто се погодени мостови, енергетска инфраструктура, пристаништа и комунални капацитети, што дополнително ги намалува изгледите за обновување на кревкиот прекин на огнот постигнат минатиот месец.

Иранскиот министер за надворешни работи Абас Арагчи изјави дека дел од барањата поврзани со иранската нуклеарна програма остануваат „нерешливи“, што дополнително ги намалува шансите за дипломатско решение.

Нафтата повторно поскапува

Ескалацијата веднаш се одрази и врз светските пазари. Цената на суровата нафта брент накратко порасна за речиси четири проценти и надмина 90 долари за барел, што е највисоко ниво во последниот месец.

Американскиот државен секретар Марко Рубио изјави дека, иако Иран испраќа сигнали за подготвеност за преговори, САД ќе продолжат да одговараат на нападите со ракети и беспилотни летала. Според него, Вашингтон ги таргетира иранските капацитети кои се користат за загрозување на меѓународниот поморски сообраќај во Ормускиот Теснец.

Bloomberg

Во меѓувреме, Кувајт повторно се најде на удар на иранските одмазднички акции. Националната нафтена компанија соопшти дека еден нафтен објект претрпел значителна материјална штета, по што бил евакуиран, а неколку лица биле повредени. Покрај тоа, нападнати биле и две постројки за производство на електрична енергија и за десалинизација на вода.

Израел, пак, соопшти дека пресретнал иранско беспилотно летало во близина на сириската граница, при што министерот за одбрана Израел Кац предупреди дека Израел повторно ќе интервенира доколку биде нападнат.

Расте загриженоста во регионот

Според медиумски извештаи, САД испраќаат дополнителни борбени авиони Ф-16, Ф-35 и авиони за воздушно полнење гориво на Блискиот Исток, што се толкува како подготовка за можно проширување на воените операции.

Во меѓувреме, Саудиска Арабија, Обединетите Арапски Емирати и Катар изразија сериозна загриженост поради понатамошната ескалација на конфликтот, додека Јордан повика ирански дипломат на разговор. Обединетите Арапски Емирати порачаа дека нападите врз цивилна инфраструктура, болници, училишта, енергетски постројки и транспортни капацитети не можат да бидат оправдани под никакви околности.

Bloomberg

Дополнителни тензии се забележани и во Ормускиот Теснец, каде што Иранската Револуционерна Гарда соопшти дека запрела четири странски пловни објекти кои, според нивните тврдења, користеле „небезбедна рута“ без претходна координација. Иранските власти предупредија дека ниту еден товар со нафта, природен гас или хемиски производи нема да може да помине низ теснецот без нивна дозвола.

Истовремено, Велика Британија извести дека добила информации за брод во пламен северозападно од оманскиот полуостров Кумзар, но причините за инцидентот засега не се официјално потврдени.

Во услови на сè поголема воена ескалација, аналитичарите предупредуваат дека ризикот од поширок регионален конфликт останува висок, а секој нов напад дополнително ги намалува шансите за брзо дипломатско решение.