Цените на нафтата во пад по охрабрувачките сигнали од САД

Цената на нафтата падна, откако во средата порасна за речиси 4 отсто, бидејќи САД повторно посочија дека значителни количества нафта продолжуваат да поминуваат низ Ормускиот Теснец.

Глобалниот репер брент се намали кон 102 долари за барел, додека американската сурова нафта ВТИ (West Texas Intermediate) се движеше околу 91 долар. Американскиот министер за финансии Скот Бесент изјави за „Фокс“ дека низ Ормускиот Теснец „понекогаш“ дневно транзитираат 17 милиони барели нафта. Сепак, други аналитичари наведуваат пониски бројки, при што „Кларксонс“ (Clarksons Research) претходно овој месец го процени дневното количество на околу 8 милиони барели.

„Нафтата паѓа затоа што пазарот постепено ја намалува геополитичката премија на ризикот, бидејќи снабдувањето од Заливот се обновува и растат надежите за дипломатски пробив меѓу САД и Иран“, изјави Пријанка Сачдева, раководителка на пазарни анализи во „Филип Нова“ (Phillip Nova Pte Ltd). „Но физичкиот пазар сè уште не е целосно нормализиран, па движeњето надолу останува многу чувствително на новинските наслови.“

Суровата нафта нагло поскапе оваа година бидејќи војната меѓу САД и Иран, како и последиците од конфликтот меѓу Русија и Украина, го намали снабдувањето и ја оштети инфраструктурата. Широкиот раст на цените на енергентите ја поттикна глобалната инфлација, зголемувајќи го притисокот врз потрошувачите и создавајќи дополнителни предизвици за централните банки.

Нафтените деривати, вклучувајќи го и дизелот, поскапеа повеќе од самата сурова нафта, при што малопродажните цени на дизелот во САД, кој се користи во транспортот, градежништвото и земјоделството, достигнаа рекордни нивоа. Тоа поттикна некои од законодавците да побараат ограничувања на извозот. Претседателот Доналд Трамп претходно оваа недела изјави дека ги охрабрил своите советници да поддржат забрана.

Фјучерсите на дизелот во САД благо пораснаа откако во средата паднаа поради шпекулации дека Белата куќа разгледува ограничувања. Сепак, министерот за енергетика Крис Рајт изјави дека администрацијата работи со рафинериите за доброволно да ги намалат испораките како алтернатива на целосна забрана.

Во САД дипломатското внимание се префрли кон самитот меѓу претседателот Трамп и кинескиот лидер Шји Џјинпинг. Запрашан дали ќе разговара за Иран на средбата со Шји, Трамп одговори потврдно. Кина вообичаено е голем увозник на иранска нафта, иако испораките се ограничени поради американската блокада кон Исламската Република.

Во Ормускиот Теснец, кој го поврзува Персискиот Залив со светските пазари, нападите врз пловни објекти продолжуваат. Според МТО (UK Maritime Trade Operations), товарен брод останал без контрола и во пламен откако бил погоден од проектил.

Цените на суровата нафта пораснаа во средата откако иранскиот претседател Масуд Пезешкијан во говор пред Обединетите нации укажа на сè уште големите разлики меѓу Техеран и Вашингтон. Тој изјави дека неговата земја нема да одговара на закани и постави неколку услови пред да можат повторно да започнат сериозни преговори.

Пезешкијан истакна дека Иран нема да дозволи слободна пловидба низ Ормускиот Теснец додека американските ограничувања остануваат во сила. Исламската Република „не може да прифати сите да имаат корист од овој воден пат, додека истовремено неговиот историски чувар е лишен од тоа поради репресивните санкции“, рече тој.