Врховниот суд донел пресуда со која се одзема зградата на Сојузот на синдикатите на Македонија (ССМ) во центарот на Скопје. Ова денеска го соопшти претседателот на ССМ, Слободан Трендафилов, на вонредна прес-конференција, а информацијата која дошла до синдикалното раководство е неофицијална.
Трендафилов најави дека ќе побараат оставка од претседателката на Врховниот суд Беса Адеми, како и од Советот на судии доколку донел ваква одлука.
„Работничкиот дом го преживеа катастрофалниот земјотрес од 1963 година и ќе го преживее потресот од Врховниот суд, а дали Врховниот суд ќе го преживее гневот на работниците, останува да видиме. Нема да дозволиме никој да го земе она што работниците од своја пот го изградиле“, вели Трендафилов.
По прес - конференцијата на синдикалниот лидер, веста за можноста за одземање на зградата на Работнички дом ја коментираше и премиерот Димитар Ковачевски кој во изјава за медиумите рече дека е на страната на Сојузот на синдикати.
„Јас сум член на Синдикатот од 1999 година и сум 100-процентно на страната на ССМ. Да живее Синдикатот и да живеат работниците и работниот народ на Република Северна Македонија“, рече Ковачевски.
За пресудата на Врховниот суд, Ковачевски упати одговорите да се бараат таму бидејќи, како што рече, тој никогаш не коментира судски одлуки, „меѓутоа јас сум на страната на ССМ“.
Првиот човек на ССМ претходно рече дека од 1992 година досега правени се разни обиди да се грабне, да се приграби овој објект, познат како Работнички дом, во интерес на некои елити, вели синдикалниот лидер.
„Се воделе разни постапки со кои се сакало да се одземе имотот, меѓутоа аргументите биле пресилни. Средствата кои сме ги двоеле биле преголеми. Документите со кои сме располагале од одобрение за градба, од инвестициска програма, од договори за изградба, од обезбедени финансиски средства преку банка – синдикални пари зборувам, не зборувам пари од државата, од целокупните произнесувања на сите органи – одобрение за употреба на оваа зграда и слично, се на име и на сметка на ССМ и на никој друг“, рече Трендафилов.
Според него, загрижувачка е правната формулација која Врховниот суд ја прави врз основа на сопствено мислење, без аргументација и без користење на статути, устав и закони.
„Загрижува тоа што утре на кој било во ова општество може да му текне да одземе имот што е граден во тој период. Тука се политички партии, разни други организации и правни лица. За жал, ова може да биде погубно за граѓаните во државата. Ако имаме предвид дека најголем дел од нашите родители и татковци имаат купено општествени станови во општествени згради, утре некој ваков корумпиран судија, суд може да донесе одлука да ни ги земе нашите домови, нашите станови и да не избрка тука“, рече Трендафилов.
Тој уште вели дека претседателката на Врховниот суд била вклучена во постапката за овој предмет уште од 2005 година додека ја извршувала функцијата заменик јавен правобранител кога сакала да го земе имотот на Работничкиот дом и како што рече, денеска од „позиција на моќ ги преиначи сите постапки во кои тогаш била неуспешна“.
„Ние сме веќе во војна со Врховниот суд. Во војна се знае како се постапува – ние мора да се браниме кога тие не напаѓаат. Меѓутоа, наредниот период ние ќе напаѓаме многу повеќе од тоа што сме го правеле во минатото. Ќе се бориме против корумпираното судство. Ние слушавме политички флоскули на функционери дека само што не започнале да се борат против корупцијата во судството, меѓутоа сметаме дека со поддршката на работниците, со поддршката на оние на чија штета одлучуваат ваквите корумпирани судови, оние на чија штета се носени одлуки за одземање на нивните домови, како што е тоа Домот на работниците, ќе се избориме еднаш засекогаш“, заврши Трендафилов.
Попладнево со соопштение се обрати и Врховниот суд од каде појаснуваат дека одлуката е донесена во ноември лани, дека тужител во процесот е државата, а претседателката на Судот не одлучувала по предметот.
За разлика од синдикалното раководство, Врховниот суд тврди дека во периодот кога е изградена зградата, „правниот претходник на тужениот бил општествено политичка организација, која не обавувала стопанска дејност, поради што немала и не можела да има сопствени приходи за стекнување на имот“.
„Предметниот објект-административна зграда и земјиште се сопственост на тужителот, согласно одредба од член 82 од Законот за здруженија на граѓани и фондации, бидејќи правниот претходник на тужениот, истите ги изградил и стекнал во поголем дел со средствата добиени од тужителот како правен следбеник на тогашната НР Македонија, а не со сопствени средства, со оглед дека истите во периодот на изградба на објектот, со својот правен субјективитет немал ниту можел да има сопствени средства“, се наведува во соопштението.
Во пресудата Врховниот суд наведува дека претходно тужбата од државата кон ССМ како неоснована ја отфрлиле прво Основниот граѓански суд Скопје, а потоа и Апелацискиот суд.
Со последната пресуда, се задолжува тужениот (Сосјузот на синдикатите на Македонија, н.з.) да му ги надомести парничните трошоци на тужителот (државата, нз.з.) во вкупен износ од 376.920,00 денари, во рок од 8 дена по приемот на пресудата, пишува во неа.
Текстот е ажуриран со изјавата на премиерот Димитар Ковачевски и соопштението на Врховниот суд
.webp){kind=icon}
Во моментов нема коментари за веста. Биди прв да коментира...