Дали се враќате на работа решителни, пиете здрав сок, се откажувате од алкохол и ја проверувате вашата нова апликација за јога? „Гугл трендс“ покажува дека ширум светот пребарувањата за зборот „диета“ достигнаа максимален резултат од 100 на почетокот на јануари, потврдувајќи ја работната претпоставка дека сите сакаме да се изложиме себеси на неуспех на почетокот на годината.
Постои уште една диета што решивме да ја практикуваме секој јануари – најважната на работа: борбата против напорниот распоред. Нашите календари обично ја започнуваат годината слабо, но брзо се полнат. Доволно е да се каже: ако поминатите часови беа килограми, бројот на вагата ќе растеше како што одминува годината.
Ние се опседнуваме со управувањето со времето токму затоа што е толку неостварливо. Тоа е исто толку суштинско за најпродаваните книги како „Атомски навики“ во овој век како што беше суштинско за „7-те навики на многу успешните луѓе“ во минатиот век.
Технологијата е и дел од решението и дел од проблемот. Ајде прво да ги слушнеме лошите вести: студијата на „Харвард Бизнис ривју“ од 2022 година покажа дека луѓето го префрлаат вниманието помеѓу апликации и веб-страници во просек 1.200 пати на ден, или девет проценти од нивното работно време во текот на една година. Претпоставувам дека не сте изненадени. Го имате најновиот софтвер за закажување, но некој ви внесува состанок во календарот и пред да знаете, сте ја изгубиле концентрацијата.
Управувањето со времето не е исто што и управувањето со задачи, што инаку е огромен пазар кој ќе достигне седум милијарди долари за софтвер до 2032 година односно годишна стапка на раст од 13 проценти. Управување со задачи е кога некој друг го контролира вашето време, а не обратно. Она што јас го нарекувам бесмислено, појавувањето на работното место само за да се појавиш, не е добро искористување на времето. Добро структурираните задачи со висока стапка на доверба во испораката се многу подобри.
Технологијата исто така ослободува време, се разбира. „Меккинси“ проценува дека сегашната генеративна вештачка интелигенција и другите технологии имаат потенцијал да ги автоматизираат работните активности кои апсорбираат 60 до 70 проценти од времето на вработените.
Но, тоа сепак не е доволно. Тоа е затоа што времето го цениме емоционално и постојано ни се оддалечува. Во 1930-тите, филозофката и романсиерка Ајрис Мардок му напишала на своето момче Френк Томпсон, жалејќи се дека: „Како Пруст, сакам да избегам од вечното туркање и штракање на времето во студенилото и рамнотежата на уметничкото дело. Тоа бара мир и тишина и време, време, време што го немам. Ах, по ѓаволите, го немам“.
Лековите за инјектирање „оземпик“ и „вегови“ ја трансформираат прехранбената индустрија. Сепак, сè уште нема инјекција што можеме да ја земеме за да управуваме со времето. Се се сведува на стратегија, тактика и волја. Студијата цитирана од „Харвард Хелт“ покажува дека ви треба висока доза од сите три, плус многу вежбање, за да имате шанса една од пет да го одржите губењето на тежината.
За управувањето со времето напишав во мојата книга „Принципот на едноставност“, која е сумирана овде за да ви заштеди време. Успешното управување со времето зависи од одлучноста и намерата. Но, можеби најкорисното нешто е навистина да ја следите аналогијата со диетата и да го третирате вашиот распоред како вашето тело.
Наместо да броите јаглехидрати и калории или да се откажете од задоволствата, пресметајте ги неопходните, вообичаени и токсични навики кои ви го крадат времето. Одлучете која диета сакате да ја испробате. Не е важно дали се работи за временски блокови – кога планирате фиксно време во текот на денот за одредени задачи – или групирате задачи – кога правите слични задачи одеднаш – или едноставно ставање на знакот „ООО“ (анг. надвор од канцеларија) дури и кога си таму.
Помислете на тоа како кето диета или медитеранска диета – или дури и нашиот стар пријател, диетата со супа од зелка, која сè уште е популарна во пребарување на Гугл по сите овие години.
Не велам дека временските диети се попријатни од другите диети. Велам дека се важни. И со текот на времето се чувствувате одлично.
.webp){kind=icon}
