Ширењето на интернетот и ерата на дигитализација што ја донесе овој феномен ја зголемија употребата на компјутери на работните места, па сè повеќе луѓе ја градеа и градат својата кариера „врзани“ зад работните маси.
Тоа ја намали физичката активност на работниците, кои со текот на времето почнаа да се соочуваат со здравствени проблеми поврзани со долготрајното седење. Токму во таа точка од времето фитнесот ја доживеа својата преродба.
Денес, со сè подостапните информации онлајн и подемот на социјалните мрежи и натаму се менува перцепцијата на луѓето за тоа што е фитнес.
„Луѓето генерално станаа поинформирани, па се промени ставот дека фитнесот значи само бодибилдинг или аеробик, или пак дека кревањето тегови е само за мажи. Истовремено сè почести станаа медицинските истражувања за бенефициите од спортувањето кај генералната популација, што дополнително придонесе за популаризација на спортот и спортските активности“, вели Иван Колачески, тренер во фитнес-студиото „Мувс“ (Moves) во Скопје.
Нови реклами за нови клиенти
Таквата промена на гледиштето го трансформираше и начинот на кој фитнес-студијата привлекуваат клиенти и ја шират својата мрежа.
Маркетингот сега, за разлика од пред 10 години, кога беше претежно насочен на физичкиот изглед, е пренасочен кон промовирање на здравствениот аспект на вежбањето или, пак, на страшните последици што произлегуваат од неактивноста кај седечките професии.
Тоа може да се забележи и при терминологијата што почна да се користи во маркетинг-кампањите.
„Додека порано често гледавме како во маркетиншки објави се користи ‘теретана’ - сега гледаме ‘фитнес-центар’ или ‘фитнес-студио’. На пример, многу почесто на рекламите за вежбање се забележуваат насмеани лица што лесно се движат, а сè поретко агресивни кревања на отпор со агресивна музика во заднината“, посочува Колачески.
Овие трендови и зголемениот интерес за фитнесот ги направија социјалните мрежи и погодно место за привлекување нови клиенти, каде што за корисниците се пласираат најразлични реклами за намалување на телесната тежина, за покачување на мускулната маса, но тој наплив на реклами носи и ризици.
Depositphotos
„Негативната страна на популаризацијата што ја гледаме во моментот е дека социјалните мрежи се исполнети со компании и индивидуи што нудат лажни ветувања за брзи и лесни резултати или, пак, непроверени или небезбедни суплементи“, објаснува нашиот соговорник.
Поради тоа луѓето треба да бидат внимателни во однос на фитнес-инструкторите што промовираат опасни практики, екстремни диети или употреба на нерегулирани додатоци.
Ако некој инструктор постојано промовира производи без јасна едукативна содржина, тоа може да биде показател дека е во потрага по брз профит и целта не му е бенефиција за клиентите.
Легитимните фитнес-професионалци обично имаат сертификати од признаени организации. Пожелно би било да проверите какви се нивните квалификации поврзани со фитнесот, исхраната или која било специфична област на експертиза што тврдат дека ја поседуваат.
Програмерите логирани на здрав животен стил
Популарноста на фитнесот и спортувањето дополнително се интензивираа со подемот на информатичката технологија (ИТ), при што новите генерации во индустријата станаа посвесни за потребата од поголема активност и поздрави практики, како замена за долгите часови минати во седење пред компјутер.
Иако седечките професии отсекогаш биле проблематични, дури откако се случи огромен раст на вработени во ИТ-индустријата, фитнес-центрите и персоналните тренери започнаа да укажуваат на тој проблем поактивно.
Во овој контекст исто така одредена улога имаат и високите плати во ИТ-индустријата, кои им дозволуваат на вработените во тој сектор уште повеќе да вложуваат во себе и во своето здравје, создавајќи голема бројка на потенцијални фитнес-клиенти.
„Тоа доведе до ситуација во која барањата на клиентите од стандардното 'вежбање за изглед' преминаа во вежбање за подобрување на здравјето, намалување на болката или генерално подобрување на движењата. Со тоа истовремено се зголеми потребата за вработување тренери во фитнес-индустријата, но и потреба за доедукација или пренасочување за претходно активните“, вели Колачески.
Водечките технолошки компании во светот веќе одамна ја нотираа важноста за благосостојбата на вработените. Корпоративните велнес-програми станаа главен елемент во многу ИТ-организации, нудејќи фитнес-програми, здравствени прегледи и поддршка за менталното здравје. Овие иницијативи не само што го зајакнуваат моралот туку поттикнуваат и чувство на заедништво меѓу вработените што се стремат кон поздрав начин на живот.
Иван Колачески, фитнес-тренер
Приватна архива
Таквите практики ги следат и ИТ-компаниите што работат во Македонија. Голем дел ИТ-фирми кај нас соработуваат или директно со фитнес-студијата или преку „посреднички“ фитнес-апликации, како што се Фиткит (FitKit) или Спортмастер (Sportmaster).
„Кога се соработува директно, најчесто тоа е во форма на плаќање целосно или дел од членството за вработените во фирмата на месечно или годишно ниво, додека пак кога се соработува со посредничка фирма, најчесто фирмата им доделува одредена бројка на посети или поени што можат да ги искористат за фитнес-активности во текот на месецот“, појаснува Колачески.
Вежбање од далечина и флексибилни термини
Во духот на професијата, стана тренд ИТ-работниците да се поврзуваат и мотивираат меѓусебно преку виртуелни простори. Онлајн фитнес-заедниците, кои опфаќаат групи на социјалните мрежи до специјализирани форуми, нудат можност за споделување совети за вежбање, успешни приказни, па дури и виртуелни фитнес-предизвици.
И кај нас веќе некое време постојат формални и неформални онлајн фитнес-заедници. Некои од фитнес-заедниците што започнаа како вибер-групи за мотивација, низ годините прераснаа и во клубови за вежбање, трчање и планинарење, но практиката на држење онлајн тренинзи никогаш не го доживеа својот бум во Македонија, освен во текот на пандемијата на ковид.
Тогаш постоеја активни онлајн групи и голем број тренери изведуваа тренинзи „еден на еден“ преку веб-апликации, но по укинувањето на мерките згаснаа и речиси сите такви групи.
Поради флексибилноста да дизајнираат лични распореди, вработените во ИТ-секторот ја користат можноста да се ослободат од традиционалната работна рутина „од 9 до 5“ (термин што се однесува на траењето на работното време). Многумина сега одат на трчање или практикуваат домашно вежбање во периоди во кои во минатото би биле на работното место.
Промените што произлегуваат од клиентите што имаат работа со флексибилен распоред ги чувствуваат и македонските фитнес-студија, каде што полека започнаа да се исполнуваат и оние термини што вообичаено никому не би му одговарале за тренирање (од 11 до 15 часот).
Технологијата и фитнесот тандем за иднината
Еден од највпечатливите аспекти на промената што ја доживеа фитнесот во дигиталната ера е интеграцијата на технологијата. ИТ-професионалците, кои се мајстори за иновации, ги користат своите вештини, но и искуства од слободното време, за да развијат и интегрираат врвна технологија во вежбањето. Синергијата меѓу фитнесот и технологијата се засилува преку апликации што ги следат рутините за вежбање преку уреди што се носат и ги бројат чекорите во текот на денот, па до појавата на виртуелни програми за вежбање.
Depositphotos
Во последните години сè поочигледни се и тенденциите на технолошки гиганти од Силициумската Долина како „Епл“ (Apple), „Мета“ (Meta) „Тонал“ (Tonal), кои привлечени од апетитот на потрошувачите за фитнес-технологија и вежбање оддома, ја препознаа комерцијалната можност и лансираа свои технолошки фитнес-услуги и производи. Со поголеми буџети, навидум бескрајни ресурси, воспоставена лојалност кон брендот и пристапност до корисници низ светот, овие новодојденци во фитнес-просторот извршија голем притисок за промена.
Меѓутоа, професионалците во фитнес-индустријата се категорични дека и покрај развојот на технологијата, односно на софтверот и апликациите што во некои области ја олеснија работата на тренерите, таа никогаш нема во целост да го замени човечкиот фактор.
Тоа доаѓа оттаму што фитнес-индустријата е пред сè услужна дејност, каде што најважен е човечкиот аспект, односно непосредната врска со тренерот е од витално значење за клиентот.
„Главната работа на фитнес-тренерите се комуникацијата со клиентот и тековното модифицирање на изведбите, товарот или начинот на изведување на тренингот, што е нешто што не може успешно да биде изведено со помош на 'виртуелен тренер', ниту пак верувам дека ќе биде“, вели Колачески.
ИТ-секторот влезе во фитнесот главно поттикнат од желбата на програмерите и другите професионалци да ја подобрат својата благосостојба, па водени од стручноста на тренерите со текот времето развија уреди и софтвер што би го унапредиле целокупното искуство. Она што е видливо на хоризонтот е уште поголемо испреплетување на најдоброто од двете индустрии во иднина, што секако е добра вест за сите што седат пред своите компјутери и размислуваат за тоа дали и како е можно да го внесат фитнесот во своето зафатено секојдневие.
.webp){kind=icon}
