Македонија е на 76-то место од 180 држави според најновиот Индекс за перцепција на корупцијата, кој секоја година го објавува „Транспаренси интернешнел“. На скалата каде што нула поени значи дека е најкорумпирана, а 100 е најмалку корумпирана, Македонија има 42 поена. Во споредба со извештајот за 2022 година, Македонија бележи скок од девет места, тогаш беше рангирана на 85-та позиција, но ако се гледаат освоените поени, има само два плус во споредба со една година претходно. Тоа што има 42 поена значи дека во земјава останува високото ниво на корупција. Измените во Кривичниот законик се наведуваат како главна забелешка за слабиот напредок на земјата во борбата против корупцијата.
„Само што почнаа да се појавуваат некои мали знаци на напредок, судскиот систем во Северна Македонија беше значително ’нарушен’ со недемократски направените измени на Кривичниот законик“, се наведува во извештајот.
Во него се наведува дека одлуката да се намалат казните за злоупотреба на службената положба за лична корист и скратените рокови за поведувањето правна постапка за сомнителни случаи на корупција се голема услуга за корумпираните луѓе.
„Се проценува дека 200 случаи ќе бидат отфрлени, вклучувајќи ги и оние против поранешни високи функционери. Политички мотивираните назначувања и разрешувања на судии предизвикуваат дополнителна загриженост за способноста на судството ефикасно да се бори против корупцијата“, се наведува во извештајот.
Во споредба со другите земји од регионот Адрија, најдобри резултати во борбата со корупцијата има Словенија, која го дели 42-то, а по неа е Хрватска на 57-то место. Србија се најде на 104-то место со 36 поени, што укажува на значителни предизвици во перцепцијата на корупцијата во земјата. Босна и Херцеговина е на 108-то место, со 35 поени.
На глобално ниво, Данска, Финска, Нов Зеланд и Норвешка продолжуваат да водат како земји со најниска перцепција за корупција, додека на спротивниот крај на скалата се земји како Сирија, Венецуела и Сомалија, кои се погодени од кризи.
Значајно е да се спомене дека некои од водечките светски економии, како Германија, која е на 9-то место, и Франција, на 20-то место со 71 поен, исто така се високорангирани, иако со мали флуктуации во поените во однос на претходната година.
Како што забележува организацијата, повеќето региони стагнираат или уназадуваат во борбата против корупцијата, но некои земји покажуваат значителен напредок. Западна Европа и ЕУ водат со просечни 65 поени, иако и тие бележат пад поради слабеењето на контролите и рамнотежите и политичкиот интегритет.
Источна Европа, Централна Азија, Блискиот Исток и Северна Африка и Азија и Пацификот стагнираат или се борат со проблеми како што се нефункционалното владеење на правото, авторитаризмот и корупцијата.
Во Америка, недостигот од независност на судството и слабото владеење на правото придонесуваат за широко распространета неказнивост.
„Корупцијата ќе продолжи да цвета додека правосудните системи не бидат способни да ги казнат неправилностите и да ја држат владата под контрола. Кога правдата може да се купи или политички да се опструира, луѓето страдаат. Лидерите треба целосно да вложуваат во независноста на институциите што го спроведуваат законот и се борат против корупцијата и во гаранцијата за таа независност“, изјави Франсоа Валеријан, претседател на „Транспаренси интернешнел“.
.webp){kind=icon}
