Уште не се навикнавме на идејата дека земјава има нова, техничка влада, а таа веќе остана без двајца министри. Едниот беше министер за здравство, сектор што треба да се справи со сè поголемиот број заболени со магарешка кашлица.
До изборите има уште долги три месеци или уште деведесетина дена од вкупно 100, колку што трае мандатот на преодната влада, тие месеци ќе бидат уште подолги за бизнисот, за кој во предизборие сè запира. За македонските компании периодот пред избори станува предизвик од типот на климатските промени или случувањата околу Црвено Море.
Во соработка со Европската Унија, претходната влада го подготвила новиот закон за сметководство, кој треба да ја помести земјава напред и да овозможи ЕСГ-стандардите да станат ново нормално и во Македонија. Сепак, и носењето на тој закон многу е веројатно дека ќе зависи од изборите.
Предизборието не беше пречка за Законот за стратегиски инвестиции да го помине првиот филтер во Собранието. Владата со овој закон си овозможува да обезбеди редица поволности за инвеститорите што ќе градат капацитети од обновливи извори. Таа ќе може да им понуди државно земјиште, банкарски гаранции, финансиска помош и ослободување од еколошки даноци.
Од претходната влада подготвен и недонесен остана и законот за забрана на нефер трговски практики, кој исто така е во согласност со европските директиви и треба да биде економска мерка за регулирање на цените во малопродажбата. Тие во моментов се замрзнати, а експертите стравуваат дека по истекот на владината мерка за гарантирана цена, инфлацијата пак ќе забрза.
Замрзнатите цени, според статистичките податоци, не придонесоа за раст на прометот во малопродажбата. Сега, нашите аналитичари прогнозираат дека повисоките плати ќе играат значајна улога во заздравувањето на трговијата на мало. Останува отворено прашањето дали заздравувањето ќе се прелее и на земјоделскиот сектор, затоа што податоците покажуваат дека земјоделската Македонија увезува сѐ, дури и грав од Азербејџан и лук од Кина.
Од почетокот на оваа година заздрави прометот на Македонската берза. Во јануари се зголемил за 38,9 проценти во однос на декември 2023 година. Прометот лани беше проблематичен и кај регионалните берзи, очекувањата за годинава се дека спасот ќе се бара во обврзниците затоа што лани обврзничките фондови „растурија“, покажува анализата на работата на македонските инвестициски фондови.
Неделава анализиравме и дали граѓаните на Македонија наскоро ќе можат да пазарат со дигитален денар. Од Народната банка велат дека придобивките од дигитализација на валутата се големи, но дека ќе мора да се почекаат резултатите од студијата што ја подготвуваат заедно со Светската банка за да се види какво би било влијанието, меѓу другото, и во водењето на монетарната политика.
А олабавувањето на монетарната политика во еврозоната и натаму останува во доменот на шпекулациите. Датумот за намалувањето на каматните стапки е само почеток на дилемите за ЕЦБ, која располага со податоци што велат дека за овој чекор е уште рано. Во меѓувреме, иако неочекувано пораснаа нарачките на германските компании во декември, моторот на европската економија бележи пад на производството подолго од половина година.
Ништо подобри вести не стигнуваат ниту од американските технолошки компании, за само еден месец од 2024 година тие скратиле 32.000 работни позиции.
.webp){kind=icon}
Во моментов нема коментари за веста. Биди прв да коментира...