Собранието, со гласови од 90 „за“, ниеден „против“ и без воздржани, во рамките на 144. седница, по скратена процедура, го прифати Законот за измени на Законот за безбедност на сообраќајот на патиштата. Според новите изменувања, возачките дозволи со ознаката „Република Македонија“ ќе останат важечки до крајот на 2024 година.
Предложените изменувања, поднесени од пратениците Никола Мицевски, Мартин Костовски, Вјолца Адеми, Аднан Незири, Димитар Апасиев и Павле Трајанов, имаат за цел олеснување на граѓаните и намалување на притисокот поврзан со вадењето на нови возачки дозволи. Согласно изјавата на координаторот на ВМРО-ДПМНЕ, Мицевски, предложените промени беа објаснети како мала, но важна корекција која ќе ги олесни граѓаните во процесот на вадење на лични документи.
МИА
Во текот на дебатата, пратениците Бејџан Иљаз од Демократската партија на Турците, Димитар Апасиев од Левица и независниот пратеник Гордана Сиљановска-Давкова изразија различни ставови во врска со промените. Иљаз истакна дискриминација врз турска заедница, побарувајќи иницијатива за издавање на пасоши на турски јазик. Апасиев и Сиљановска-Давкова изразија сомнежи во ефикасноста на промените и потенцијалните недостатоци во нивната примена.
Според првичното решение, возачките дозволи со ознаката „Република Македонија“ требаше да изгубат важност утре, но со новите изменувања, рокот е продолжен до крајот на 2024 година.
Претседателот Стево Пендаровски го потпиша указот за измените на Законот за безбедност на сообраќајот на патиштата со кои се пролонгира важењето на возачките дозволи со старото уставно име, а крајниот рок за нивна замена ќе биде 31 декември 2024.
Претседателот Пендаровски, како што соопшти неговиот Кабинет, ја поздравува одлуката на пратениците кои денеска ги ставија интересите на граѓаните над дневната политика и донесоа решение за возачките дозволи.
.webp){kind=icon}
