Над 40 компании во регистарот за НАТО тендери: Како до парче од 10 милијарди евра?

Расте бројот на компании кои преку Министерството за одбрана се впишуваат во регистарот на компании кои можат да се пријават на тендерите на НАТО пазарот. Ако во 2021-та година тој број бил осум, во 2023-та дваесет и една, а до денеска вкупно 44 компании ја имаат таа можност. За ова информираше министерката за одбрана Славјанка Петровска говорејќи на настанот кој Министерството го организира заедно со НАТО Агенцијата за поддршка и набавки и НАТО Агенцијата за комуникации и информации. Станува збор за НАТО Индустриски ден на кој компаниите подетално можат да се запознаат со постапките и процедурите за настап на НАТО пазарот кој во моментов изнесува над 10 милијарди евра на годишно ниво.

„Станува збор за значаен пазар од над 10 милијарди евра на годишно ниво кој не смееме да го пропуштиме. Мораме да бидеме амбициозни, да се натпреваруваме со квалитет и со капацитети и да докажеме дека македонските компании технолошки и развојно можат да одговорат на барањата и да бидат конкурентни со компаниите во сојузничките земји“, рече министерката.

Славјанка Петровска/Министерство за одбрана

Додаде дека наскоро ќе биде испратен претставник од нашата земја во Агенцијата за поддршка и набавки со што дополнително ќе се олесни пристапот на македонските компании на НАТО пазарот.

Вицепремиерот Фатмир Битиќи рече дека пред домашните компании се отвори простор да учествуваат во тендерски постапки на овој пазар и дека тоа е шанса да пристапат и да бидат дел од поширока мрежа на економска соработка и трговски партнерства. „Ова ќе ги засили нивните капацитети за иновации, квалитет и ефикасност, ќе ја подигне нивното ниво на конкурентност и за 500 милионскиот европскиот пазар. 

Генералната менаџерка на Агенцијата за поддршка и набавки, Стејси Камингс рече дека веќе има примери на учество на дел од компаниите од Македонија кои што успешно учествувале на тендерски постапки, исклучиво договори. „Денеска имаме една подлабока можност да зборуваме за механизмите, политиките, процесите и начинот на којшто голем број на компании од вашата земја може да учествуваат на тендерите, односно да бидат конкурентни со другите компании од другите земји членки на НАТО“, рече Камингс.

Министерство за одбрана

Според шефицата за набавки во НАТО Агенцијата за комуникации и информации, Џенифер Аптон, НАТО планира раст од 61 отсто на глобалниот заеднички финансиран буџет и програми со индикативни бројки кои предвидуваат импресивно зголемување од 227 отсто до 2030 година.

„Ова е значителен раст за да ја задоволиме оваа растечка побарувачка, ја препознаваме потребата од искористување на можностите на индустријата и олеснување на обезбедувањето на резултати со потребната брзина, рече Аптон.

За да им помогне на компаниите во процесот на добивање на потребните сертификати за учество на тендерите на НАТО пазарот, Министерството за одбрана креираше Центар за поддршка на компаниите. Преку овој Центар се врши упис на економски оператори и се добива потврда за исполнетост на услови за учество во постапките за набавки за потребите на НАТО и земјите – членки.

На НАТО Индустрискиот ден учествуваат компании од прехранбената, фармацевтската, енергетската индустрија, ИТ секторот и други.

Во моментов нема коментари за веста. Биди прв да коментира...

Остави коментар