text size
Осум хеликоптери од италијанскиот производител „Леонардо хеликоптерс“ (од моделите AW169 и AW149M) ќе бидат набавени за потребите на македонската армија. Вредноста на леталата ќе изнесува 230 милиони евра, а ќе се плаќа сукцесивно на четири рати. Првата рата ќе биде исплатена годинава и е во износ од 16 проценти од вкупната вредност на набавката.
Како што информира на брифинг министерката за одбрана Славјанка Петревска, изборот е направен во согласност со долгорочниот план за развој на одбранбените способности 2023-2032 година и плановите на армијата за обновување на воздухопловната компонента.
Министерство за одбрана (презентација)
Таа потенцира дека постапката за изборот на компанијата е започната по оглас објавен во 2019 година, за што бил формиран интегриран проектен тим составен од експерти во Министерството за одбрана и aрмијата.
Министерката објасни дека била спроведена фаза на истражување на пазарот, за што биле реализирани голем број работни состаноци и посети на компаниите кандидати за набавка на новите хеликоптери, во чии рамки биле извршени и демонстративни летови со потенцијалните нови хеликоптери.
По собирањето на сите податоци, била извршена сеопфатна и објективна анализа на понудените платформи преку различни аналитички матрици.
Министерство за одбрана (презентација)
Критериумите според кои се вршени анализите, како што беше истакнато на брифингот, биле во однос на цената на набавката, техничкото одржување и техничката поддршка, достапноста на резервни делови, животниот век на леталата и нивната модуларност и интероперабилност со НАТО-членките.
„Во фазата на истражување на пазарот и споредба на алтернативите, интегрираниот проектен тим одлучи да препорача да се пристапи кон набавка на хеликоптери од компанијата 'Леонардо хеликоптерс'“, изјави Петровска.
Министерство за одбрана (презентација)
Таа потенцира дека во пакетот на набавката влегува и обука на пилотски и технички персонал, како и достапност за симулатори за обука, а ќе биде обезбеден и хангар во кој ќе бидат сместени новите воени воздухоплови.
Првиот хеликоптер ќе пристигне во втората половина на 2026 година, а целата испорака ќе биде извршена заклучно со 2028 година.
На конкурсот за избор на компанија пристигнале четири понуди, и тоа, покрај „Леонардо хеликоптерс“, и понуди од германско-француски конзорциум, компанија од САД и од Канада.
.webp){kind=icon}
