.webp){kind=icon}
БИЗНИС
„Опен еј-ај“ (OpenAI)
„Опен еј-ај“ размислува за можноста на извршниот директор, Сем Алтман, да му понуди удел од седум отсто во согласност со планираната транзиција кон профитабилно работење. Тоа би претставувало голем пресврт, а Алтман за прв пат би добил сопствеништво над стартапот за вештачка интелигенција, пишува „Блумберг“.
Компанијата размислува и да стане корпорација со општествена одговорност, со задача да остварува профит и да му помага на општеството. Тоа го тврдат добро упатени извори. Во меѓувреме, техничката директорка на „Опен еј-ај“, Мира Мурати, објави дека ја напушта компанијата во која што помина шест и пол години.
„Опен еј-ај“ вреди 150 милијарди долари.
ЕКОНОМИЈА
ОЕЦД
Глобалната економија ја надминува инфлаторната криза и е на пат да оствари стабилен раст. Тоа се наведува во најновиот извештај на Организацијата за економска соработка и развој (ОЕЦД). Економскиот раст во последните месеци остана отпорен, инфлацијата продолжи да се намалува, а показателите сугерираат на замаец во секторот на услуги, соопштија од организацијата со седиште во Париз.
Според тоа, проекцијата за глобален раст е зголемена на 3,2 проценти за оваа година, колку што се очекува да биде и догодина. Повеќе за проекциите за раст на европската економија говореше главниот економист на ОЕЦД.
ПОЛИТИКА
Израел
На геополитички план САД, европските сојузници и арапските земји предложија тринеделен прекин на огнот меѓу Израел и Хезболах во Либан. Целта е да се отвори пат за преговори и да се спречи општа војна.
„Време е да се постигне дипломатско решение што ќе им овозможи на цивилите од двете страни на границата безбедно да се вратат во своите домови“, се наведува во заедничкото соопштение објавено синоќа.
БЕРЗИ
Европа
Фјучерсите на европските акции утрово се тргуваат мешовито во пресрет на обраќањето на претседателката на Европската централна банка (ЕЦБ), Кристин Лагард, на конференцијата на Европскиот одбор за системски разлики во Франкфурт. Европските берзи вчера се зацрвенија, при што падот го предводеа банкарскиот сектор и автомобилските компании.
Паневропскиот берзански индекс Stoxx 600 тргувањето го заврши со пад од 0,11 проценти. Најдобар резултат меѓу компаниите кои се опфатени со овој индекс постигна финската компанија што се занимава со технологија и автоматизација за различни индустриии, „Валмет“ (Valmet Corp.), чии акции пораснаа за 11,71 отсто.
Bloomberg Chartmaker
Банкарскиот сектор беше во минус по тензиите и пресвртот во процесот на преземање на германската „Комерцбанк“ (Commerzbank) од страна на италијанската „Уникредит“ (UniCredit). Индексот Stoxx 600 Banks падна за 0,73 отсто.
Кога станува збор за цената на нафтата, глобалната референтна вредност на брент (brent) нафтата потона на 71 долар за барел откако Саудиска Арабија најави можно зголемување на производството, а источната и западната влада во Либија успеаја да постигнат договор околу гувернерот.
Bloomberg Chartmaker
Договорот во Либија значи дека источната влада ќе врати одредена количина барели на пазарот. Исто така, една од причините за падот на цената на нафтата е предложениот тринеделен прекин на огнот меѓу Израел и Хезболах.
САД
И фјучерсите на американските акции варираа меѓу добивка и загуба откако се објавија новите податоци коишто укажуваат на пад на продажбата на нови домови во Соединетите Американски Држави (САД). Сепак, посебниот извештај покажува дека хипотекарните стапки се намалувале осум недели по ред, што ја поттикнала побарувачката за станови.
Берзанскиот индекс S&P 500 ослабна за 0,19 проценти, Dow Jones Industrial Average за 0,7 отсто, додека технолошкиот Nasdaq 100 успеа да забележи раст од 0,14 проценти, со „Интел“ (Intel) и „Енвидија“ (Nvidia) како предводници на растот.
Bloomberg Chartmaker
За потсетување, американските Федерални резерви (Фед) ја намалија цената на задолжувањето за 50 базични поени, во опсег меѓу 4,75 и пет отсто. Одлуката на Фед ја коментираше и гувернерката на Федералните резерви, Адриана Каглер, наведувајќи дека се можни дополнителни намалувања на каматите доколку инфлацијата продолжи да забавува.
Азија
Кога станува збор за акциите во Азиско-пацифичкиот регион, тие се тргуваат со добивка, водени од растот на акциите на технолошките компании. За тоа делумно придонесе скокот на акциите на американската компанија „Мајкрон технолоџи“ (Micron Technology) откако објави силни проекции за приходите.
На растот на азиските акции неделава влијаат и новите кинески мерки за заживување на економијата. Така, во рамки на новата поддршка, Кина објави дека размислува за вбризгување на капитал во износ од 142 милијарди долари во својата најголема државна банка, со цел да го зголеми нејзиниот капацитет за обезбедување поддршка на ослабената економија. Тоа би било прв пат од светската финансиска криза во 2008 година Пекинг да вбризга капитал во своите банки.
