Предвидувањата на Меѓународниот монетарен фонд за светската економија во следниот период не се охрабрувачки. Во последниот извештај на ММФ, кој традиционално се објавува за време на годишните среди на ММФ и Светската банка во Вашингтон, се наведува дека и покрај добрите вести за борбата со инфлацијата без појава на глобална рецесија, сепак во прогнозите доминираат ризиците што можат да го загрозат глобалниот раст. Главен ризик се регионалните конфликти, особено тој на Блискиот Исток.
За земјава ММФ прогнозира раст од 3,6 отсто следната година, што е на нивото на проекциите и на македонските власт.
Свој придонес кон оваа тема идната недела ќе дадеме и ние од „Блумберг Адрија“. „Back to business: Економски потенцијал и развојни можности на Македонија“ е првата годишна конференција, која ќе се одржи во вторник, а ќе ја отворат Христијан Мицкоски, претседател на Владата на Република Македонија, и директорката за содржина на „Блумберг Адрија“, Јелисавета Лазаревиќ.
Прочитајте повеќе:
Просечна плата: За пет години најмал раст има кај банкарите
Пад на цените на половните возила во Германија, Македонија на пат на рекорден увоз
На маргините на годишната конференција во Вашингтон, претседателката на Европската централна банка (ЕЦБ), Кристин Лагард, изјави дека насоката на патување на централните банкари е јасна, темпото ќе се определи врз основа на елементот кој гледа наназад и нанапред.
„Она што го направивме почнувајќи од јуни, мислам дека е разумен пристап со кој треба да се продолжи, при што треба да се задржи елементот на претпазливост“, изјави таа за телевизијата „Блумберг“.
Потезите на ЕЦБ ги следи и Народната банка на Македонија, која неделава по вторпат ја намали каматната стапка на благајничките записи. Сега таа изнесува 5,8 отсто.
Сепак, домаќинствата ќе почекаат за намалување на каматите на потрошувачките кредити, затоа што националната референтна каматна стапка што ја креираат банките сами и натаму расте. Од НБРМ велат дека вообичаено сигналите што ги испраќа централната банка подоцна стигнуваат до деловните банки.
Она што побрзо стигнува до банките се ризиците од климатските промени. Според извештаите на НБРМ, дури 80 отсто од кредитите што ги дале комерцијалните банки се во ризични подрачја, таму е имотот со кој се обезбедени тие кредити.
Во контекст на климатските промени, анализиравме и кога ќе се намалат штетните емисии од централите на јаглен во регионот Адрија. Секој ден продолжување на нивата работа влијае на раст на температурата, што веќе не е единствената закана. Научниците го истражуваат и негативното влијание на долгите низи на невообичаено топли денови.
Прочитајте повеќе:
Патот до „Оскарите“ со филмски буџет колку за до Табановце
Филмската индустрија во регионот: Низ трње до ѕвездите
Во исто време се состаноците во Вашингтон се одржуваа и состаноците на БРИКС. Домаќин на оваа конференција беше рускиот град Казањ, а претседателот на Русија, Владимир Путин, изјави дека новопроширената група покажа дека се создава „мултиполарен свет“, како предизвик за глобалниот поредок во кој доминираат САД.
Во САД, пак, претседателската кампања влегува во завршница. Поранешниот претседател Трамп се врати на листата на „Блумберг“ со 500 најбогати. Неговата противкандидатка Камала Харис се заложи за минимална саатнина од 15 долари. Како што се наближува изборниот ден (5 ноември) така се разменуваат и потешки зборови.
Прочитајте повеќе:
Како инвеститорите гледаат на фудбалските клубови?
Зошто лидерите тешко го препознаваат моментот кога треба да си заминат
Токму од овие избори ќе зависат многу работи. Една од нива се пазарите на капитал. Американскиот индекс S&P 500, кој инвеститорите често го доживуваат како инвестиција во американската економија, годинава постигна импресивен раст. Анализиравме до кога ќе продолжи таа берзанска бајка?
Слична бајка, ама во македонски услови, доживува и главниот македонски берзански индекс МБИ 10, кој е ѕвезда во регионот Адрија. Од почетокот на годината бележи раст од 43 проценти, а го следат BELEX15 со 30,5 проценти и SBITOP со 28 проценти.
.webp){kind=icon}