Лагард: Јасна е насоката за каматните стапки, темпото допрва треба да се одлучи

Насоката на трошоците за задолжување на Европската централна банка е јасна, но допрва треба да се одлучи за темпото со кое тие ќе се намалат, соопшти претседателката Кристин Лагард, која не исклучува поголеми потези.

Говорејќи на маргините на годишните состаноци на Меѓународниот монетарен фонд и Светската банка, Лагард вчера рече дека дезинфлацијата е на вистинскиот пат, опишувајќи ги неодамнешните бројки како „релативно смирувачки“.

„Мислам дека за мене, насоката на патот е јасна“, изјави таа за телевизијата „Блумберг“ во Вашингтон. „Она што го направивме почнувајќи од јуни, мислам дека е разумен пристап со кој  што треба да се продолжи при што треба да се задржи елементот на претпазливост“.

„Ќе има луѓе коишто цела недела ќе велат треба да биде 50, треба да биде 25“, рече Лагард. „Не. Насоката на патување е јасна, темпото ќе се определи врз основа на елементот кој гледа наназад и напред, користејќи три критериуми и примена на расудување“.

ЕЦБ ја засили брзината на намалување на стапката бидејќи инфлацијата се намалува побрзо од очекуваното и се зголемува загриженоста за здравјето на економијата од 20-те нации во еврозоната. Иако официјалните лица не нудат многу показатели за тоа колку брзо или за колку трошоците за задолжување ќе паднат, инвеститорите се обложуваат на поместувања од четвртина поен на следните четири состаноци и стапка на депозитите од два процента до средината на 2025 година.

Овие облози поттикнуваат индикации дека инфлацијата би можела одржливо да ја достигне целта од два процента порано отколку што се мислеше. Французинот Франсоа Вилерој де Галхау сугерираше дека целта всушност може да се постигне уште на почетокот на следната година.

Зборувајќи одделно, членот на Управниот совет Роберт Холцман рече дека побрзо повлекување на цените од очекуваното ќе и овозможи на ЕЦБ повторно да ги намали стапките пред да помине предолго време. Неговиот португалски колега Марио Сентено рече дека властите ќе бидат подготвени да размислат за засилување на монетарното олеснување доколку податоците сугерираат таков потег.

Пазарите на пари ги поддржуваат облозите за олабавување, при што трговците се обложуваат на 32 базични поени на намалувања во декември и 58 базични поени до јануари, во споредба со 30 базични поени и 56 базични поени порано. Тоа подразбира 28 проценти шанси за поместување од половина поен во декември.

Инфлацијата се намали под два процента во септември за прв пат од 2021 година поради падот на трошоците за енергија. Сепак, постојат постојани грижи, бидејќи растот на платите и цените на услугите остануваат покачени. Во наредните месеци се очекува привремено зголемување на инфлацијата, а Лагард, и покрај нејзиниот оптимизам, сепак имаше неколку зборови на претпазливост.

Блумберг

„Сите сме уверени дека 2025 година е година кога ќе ја достигнеме нашата цел на одржлива основа“, рече таа. „Но, треба да бидеме внимателни за сè. Имаме цени на енергијата кои се ниски во моментов во однос на тоа каде би можеле да бидат. Имаме услуги што бележат благ пад, но не многу, сè уште сме на 3,9 проценти во последното читање и мора да обрнеме внимание на домашната инфлација“.

Коментарите дојдоа во пресрет на ново објавените проекции на ММФ, кој ги намали своите прогнози за растот на еврозоната и оваа и следната година поради слабите индустриски перформанси во Германија и Италија.

Економијата исто така се бори, предводена од она што се обликува да биде втора година по ред на контракција за Германија. И креаторите на политиката мора да се справат со какви било економски последици доколку Доналд Трамп повторно го преземе американското претседателство, како и да внимаваат на олабавувачкиот циклус на Федералните резерви.

Во Европа, долгоочекуваниот скок на потрошувачките трошоци сè уште е во игра, но трае подолго од очекуваното, рече Лагард.

„Тајмингот на тоа се продолжува и европските потрошувачи, секако, генерално ја немаат истата склоност да консумираат како американските потрошувачи“, рече Лагард.

Во моментов нема коментари за веста. Биди прв да коментира...

Остави коментар