Европската централна банка (ЕЦБ) размислува за намалување на каматните стапки во октомври, доколку економијата претрпи големо назадување - иако следниот сеопфатен пакет со информации ќе биде достапен само на следниот состанок, рече претседателката Кристин Лагард.
Нејзините забелешки, на помалку од еден ден откако ЕЦБ вторпат ја намали каматната стапка за четвртина процентен поен од јуни наваму, нудат најјасен сигнал досега дека креаторите на политиките се наклонети да чекаат до декември за нивниот следен потег.
Луѓето запознаени со нивниот начин на размислување велат дека ќе биде потребно позначително влошување на изгледите за раст или агресивно олабавување од страна на Федералните резерви за да ја напуштат досегашната динамика на намалување на каматната стапка.
ЕЦБ в четврток ќе ја намали каматната стапка на депозитите за 25 базични поени.
11.09.2024
„Користиме многу податоци при правењето на проекциите, исто така добиваме податоци во меѓувреме“, им рече Лагард на новинарите во Будимпешта, каде што присуствуваше на состанокот на шефовите за финансии од еврозоната. „Ние гледаме на сè, и ако има значителна промена во однос на нашата појдовна основа, повторно ќе процениме“.
Претставниците на ЕЦБ што зборуваа пред неа во петокот исто така беа претпазливи во сигнализирањето какви било идни чекори.
Французинот Франсоа Вилерој де Гало рече дека креаторите на политиките треба да продолжат со „постепено“ намалување на каматните стапки.
„Темпото мора да биде многу прагматично“, рече тој. „Ние не се обврзуваме однапред на некоја одредена динамика на промена на стапката и ги држиме сите опции отворени за нашите следни состаноци“.
Од ЕЦБ, која првпат ја олабави монетарната политика во јуни, реагираат на последното стивнување на инфлацијата, што овозможи нејзино движење кон целните 2 процента. Додека едни се претпазливи поради долготрајните ценовни притисоци во услужниот сектор, други се загрижени дека влошената економија на еврозоната може да доведе до тоа инфлацијата да ја промаши целната стапка како што се случи пред пандемијата.
„Веројатноста за намалување на стапката во октомври, ако ги погледнеме финансиските пазари, не е голема“, рече Мартинс Казакс од Латвија. „Но, во исто време, ако има неочекуван удар врз економијата и ако економијата биде значително послаба отколку што се очекува во моментов, додека инфлацијата исто така значително опадне, тогаш секако би можеле да размислиме и за намалување на стапката“.
Пазарите гледаат шанса за некаков потег следниот месец од само 25 проценти.
Во Литванија, Гедиминас Симкус рече дека на креаторите на политиките „ќе им треба стратешко трпение“ додека го планираат курсот на движење.
Инфлацијата „се смирува“ и „нејзината траекторија сугерира дека мора да се случат дополнителни намалувања на стапките“, изјави тој за радиото ЛРТ во петокот. „Стапките ќе продолжат да се намалуваат, но брзината на намалувањата ќе зависи од податоците“.
Според Австриецот Роберт Холцман, би можело да има „простор“ за уште еден потег од четвртина поен „во декември“, што сугерира дека можеби нема да има доволно дополнителни податоци за ЕЦБ да се одлучи за чекор во октомври, според интервјуто објавено од „Фајненшл тајмс“.
Симкус ја наведе инфлацијата кај услугите како „клучна неизвесност“ - опасност што беше нагласена и од Словенецот Боштјан Васле и од претставникот од Естонија Мадис Мулер.
Имаше уште некои позитивни оцени за трендовите на цените, при што претседателот на Бундесбанк“ (Bundesbank), Јоаким Нагел, ја опишува перспективата како „многу добра“.
„Претпоставуваме и податоците нѐ поткрепуваат во тоа дека ќе ја достигнеме нашата цел за инфлација од 2 процента до крајот на следната година“, рече тој за „Дојчландфунк“ (Deutschlandfunk). „Портфолиото на податоци е такво што го оправда вчерашното намалување на стапката“.
Но кварталните прогнози што ги поткрепуваат тие коментари - исто така објавени во четвртокот - покажаа дека економијата веројатно ќе закрепне помалку од предвиденото за 2024, 2025 и 2026 година.
Навистина, по краткото заживување на почетокот на годината, замавот на растот на Европа бледнее, при што производителите сè уште се погодени од повисоките трошоци за енергија и млаката побарувачка надвор од монетарниот блок на 20-те држави. Долгоочекуваното закрепнување предводено од потрошувачите допрва треба да се оствари.
За некои, влошените околности се причина да останат на штрек.
Растот „останува бавен во еврозоната, а надолните ризици за растот се зголемија во текот на летото“, рече Финецот Оли Рен. „Затоа, ги задржуваме целосната слобода на дејствување и флексибилноста во донесувањето одлуки за каматните стапки на нашите идни состаноци“.
Поранешниот главен економист на ЕЦБ, Петер Прет, смета дека „најдоброто сценарио“ за челниците во Франкфурт е стапката да се намали во декември. Но факторите како што е пообемното намалување на трошоците за задолжување следната недела од страна на Фед сепак би можеле да го овозможат потегот во октомври.
„Декември е далеку, може да се случат многу работи“, изјави тој за телевизијата „Блумберг“ во петокот. „Значи, ЕЦБ се обидува да ги држи сите опции отворени“.
„Има многу аларми и голем број симптоми што укажуваат дека не е далеку сериозна криза за руската економија“, вели Денис Манцевич, експерт за руската економија.
Кинеските власти соопштија дека ќе започнат истрага за медицински CT рендген цевки увезени од САД и Индија и ќе го стопираат увозот на производи од живина од две американски компании.
Внесете ја вашата имејл-адреса на која ќе ви испратиме линк за ресетирање на лозинката.
Надминат е максималниот број уреди. Ако сте сопственик на сметката, кликнете на „Испрати најавување со е-пошта“ за да добиете е-пошта со врска за најавување. Откако ќе ја следите врската, ќе можете да управувате со уредите поврзани со вашата сметка.
.webp){kind=icon}
