Инфлацијата во еврозоната се забрзува, ЕЦБ повнимателна со каматите

Инфлацијата во еврозоната забрза во септември, зацврстувајќи ги плановите на Европската централна банка (ЕЦБ) засега да ги задржи каматните стапки непроменети.

Откако во август се совпадна со целта од 2 отсто, потрошувачките цени во септември пораснаа за 2,2 отсто на годишно ниво, поттикнати од базичниот ефект на енергентите и зголемените трошоци за услуги. Тоа е во согласност со просечните процени во анкетата на „Блумберг“ во која беа вклучени економисти.

Мерката што ги исклучува нестабилните цени на енергијата и храната остана на 2,3 отсто, како што се очекуваше, соопшти „Евростат“ во средата.

Bloomberg

Според претставниците на ЕЦБ, нивото на трошоците за задолжување е задоволително, откако најновите квартални проекции покажаа дека инфлацијата не отстапува значително од целта и дека економијата на 20-те земји од еврозоната ја издржува и зголемената тарифа од САД.

Инвеститорите и аналитичарите не очекуваат ЕЦБ да продолжи со дополнителни намалувања на каматите, по досегашните осум кратења од по четвртина поен. Сепак, некои од креаторите на политиките остануваат загрижени дека растот на цените би можел да ослабне премногу.

Ден пред објавувањето на податоците, претседателката Кристин Лагард оцени дека ризиците за инфлацијата се „доста ограничени во двата правца“ и повтори дека монетарната политика е „на добро место“. Клучната депозитна стапка моментално е 2 отсто и најверојатно ќе остане тaка до следната одлука на 30 октомври.

Што вели „Блумберг економикс“

„Забрзувањето на инфлацијата во септември веројатно нема да трае долго. Тоа е резултат на базичен ефект од енергетските цени и очекуваме главната бројка повторно да се намали во октомври. Пошироко гледано, сметаме дека зголемувањето на американските тарифи ќе изврши надолен притисок врз инфлацијата во еврозоната и таа на среден рок ќе биде под целта на ЕЦБ од 2 отсто.“

– Дејвид Пауел, главен економист за еврозоната

Според прогнозите, инфлацијата следната година ќе се намали на 1,7 отсто, а делумно ќе закрепне на 1,9 отсто во 2027 година, благодарение на новите владини инвестиции во одбраната и инфраструктурата што треба да ја поттикнат економијата.

Иако во ЕЦБ сметаат дека малите отстапувања од инфлациската цел не се причина за загриженост, анкетата на банката минатата недела покажа дека домаќинствата очекуваат уште посилен раст на цените во следните 12 месеци.

Потпретседателот на ЕЦБ, Луис де Гвиндос, денеска изјави дека сегашното ниво на каматните стапки е „вистинското“.

Во моментов нема коментари за веста. Биди прв да коментира...

Остави коментар