Приватниот сектор во еврозоната неочекувано тоне по падот на услужниот сектор

Деловната активност во еврозоната неочекувано потона првпат од крајот на 2024 година, по остар пад во услужниот сектор додека војната со Иран ги притиска потрошувачите.

Composite Purchasing Managers’ Index, изработен од „С&П Глобал“ (S&P Global), се намали од 50,7 на 48,6 во април  во претходниот месец,  паѓајќи под границата од 50 поени што го дели растот од падот. Аналитичарите очекуваа намалување на 50,1.

Приватниот сектор во еврозоната се намали во април

Bloomberg

Трендот беше сличен и во Германија, каде индустријата се одржа, додека услугите потонаа. Во Франција, производството дури ги надмина очекувањата со најсилни резултати од 2022 година, иако услужниот сектор ослабе. Ценовните притисоци продолжија да растат низ целиот регион.

„Еврозоната се соочува со продлабочување на економските проблеми поради војната на Блискиот Исток, што претставува сериозна главоболка за креаторите на политиките“, изјави во соопштение Крис Вилијамсон, главен економист за бизнис анализи во „С&П Глобал Маркет Интелиџенс“ (S&P Global Market Intelligence). „Во меѓувреме, сè пораспространетиот недостиг во снабдувањето се заканува дополнително да го ослабне растот, а во следните недели да создаде и нов нагорен притисок врз цените.“

Неочекуваната слабост ќе ја загрижи Европската централна банка, од која се очекува да се воздржи од промени на каматните стапки на состанокот овој месец. Иако инфлацијата во регионот веќе значително ја надмина целта од 2 отсто, носителите на политиките чекаат повеќе податоци за тоа колку траен ќе биде ценовниот шок. Пазарите пресметуваат две зголемувања на каматите до крајот на годината.

Повисоките трошоци за енергија, кои стојат зад забрзувањето на инфлацијата, истовремено го притискаат производството, кое се очекуваше да забрза пред избувнувањето на конфликтот. Стотици милијарди евра за одбрана и инфраструктура, особено од Германија, ќе помогнат да се ублажи ударот. Дел од владите исто така интервенираат со помош, додека цените на горивата нагло растат.

Европската централна банка во март прогнозираше дека бруто-домашниот производ ќе порасне 0,9 отсто во 2026 година и 1,3 отсто во 2027 година, иако претставници неодамна изјавија дека еврозоната е некаде меѓу тоа сценарио и понеповолна варијанта со подолга војна и послаб раст.

Вилијамсон предупреди дека песимизмот кај компаниите го турнал расположението на најниско ниво од крајот на 2022 година, додека податоците објавени во средата покажале сличен пад и кај потрошувачката доверба.

Тој предупреди и да не се преценува релативната отпорност на производствениот сектор.

Растот на секторот „доаѓа со скриена цена, бидејќи побарувачката за стоки е поттикната од создавање залихи додека компаниите брзаат да обезбедат набавки пред нови поскапувања или недостиг на снабдување.“

Осврнувајќи се на инфлацијата, Вилијамсон рече дека трошоците за влезни материјали и продажните цени нагло пораснале не само како одговор на повисоките цени на енергијата, туку и поради поширок раст на цените на суровините и несовпаѓање меѓу побарувачката и ограничената понуда.

„Ако се исклучи пандемијата со ковид-19, ова е најголемиот скок на трошочните притисоци што сме го забележале од 2000 година“, рече тој.

PMI индексите внимателно ги следат пазарите бидејќи се објавуваат рано во месецот и добро ги откриваат трендовите и пресвртниците во економијата. Како показател што ја мери распространетоста на промените во производството, а не нивната длабочина, деловните анкети понекогаш тешко директно се поврзуваат со кварталниот БДП.

Се очекува композитниот показател за Обединетото Кралство да се лизне под 50 поени, додека индексот за САД веројатно ќе остане над тоа ниво.