ББА-коментар: Каматата на ЕЦБ ќе падне барем уште еднаш во 2024 година

Европската централна банка (ЕЦБ) сосема очекувано ја намали депозитната каматна стапка на 3,5 проценти и го намали распонот помеѓу депозитната и другите две клучни каматни стапки од 50 на 15 базични поени.

Инфлаторните очекувања се малку зголемени поради упорната инфлација во услужниот сектор. Услужниот сектор и натаму е во позитивен сентимент, што се гледа од самите стапки на инфлација кај услугите, како и од индексот на доверба на менаџерите, кој е над 50 (над 50 - експанзија). Инфлацијата кај услугите (особено цените на транспортот) би можела да ја повлече надолу намалената цена на нафтата, која поради враќањето на Либија на пазарот бележи цени на ниво на оние од 2021 година. Од друга страна, прогнозата за економскиот раст е малку намалена поради геополитичките потреси и забавената економија на Западна Европа.

Пазарите на акции и обврзници позитивно реагираа на одлуката на ЕЦБ, особено берзанските индекси на периферната ЕУ, како шпанскиот IBEX35 и италијанскиот FTSE MIB, со оглед на тоа што станува збор за повеќе задолжени земји што имаат корист од олабавувањето на монетарната рестриктивност. Истата насока ја гледаме и во движењето на обврзниците, каде што денеска најмногу порасна цената на италијанските обврзници.

До крајот на годината очекуваме барем уште едно намалување на ЕЦБ за 25 базични поени, со цел полека да ѝ се даде оптимизам на економијата, но сè уште со доза на претпазливост во однос на намалувањето на инфлацијата кон планираните два процента до втората половина од 2025 година.

Што се однесува до прелевањето на пониската референтна каматна стапка врз кредитите за компаниите и населението, тоа сепак ќе оди нешто побавно, а очекуваме позитивно влијание во првата половина на следната година, што ќе ослободи дополнителен простор за штедење на компаниите, но и зголемување на капиталните инвестиции (CAPEX). Особено пониски каматни стапки ќе почувствуваат позадолжените сектори во Европа, како што се недвижностите или услугите, каде што трошоците за заштита (CDS) треба да се намалат, што дополнително ќе овозможи поповолно задолжување.