.webp){kind=icon}
Италија на аукција на 30-годишни обврзници забележа побарувачка од 130 милијарди евра, бидејќи инвеститорите се обидоа да купат хартии од вредност со повисоки приноси пред Европската централна банка (ЕЦБ) да ги намали каматните стапки.
Тамошното министерство за финансии продаде обврзници во вредност од осум милијарди евра со достасување во октомври 2054 година, а разликата во приносот во однос на референтните обврзници изнесува 13 базични поени. Побарувачката го надмина рекордот поставен во 2020 година, кога ЕЦБ откупи обврзници поради пандемијата.
Приносите на италијанскиот долг се намалуваат во последните месеци бидејќи пазарите очекуваа ЕЦБ да ги намали каматните стапки. В четврток се очекува намалување на каматната стапка на депозитите на 3,5 отсто. Пазарите на пари предвидуваат уште шест намалувања на каматните стапки до крајот на следната година, при што инфлацијата е веќе блиску до целта на централната банка од два процента.
Bloomberg
Се очекува денеска низ Европа да бидат продадени обврзници во вредност од 21 милијарда евра. Меѓу издавачите се „Баваг груп“ (Bawag Group) од Австрија и ЕДФ (Électricité de France) од Франција.
„Италија забележа 130 милијарди евра побарувачка на аукцијата за 30-годишни обврзници. Тоа може да се должи на нестабилноста во Франција. Распонот меѓу приносите на италијанскиот и францускиот долг се врати на 70 базични поени, најниско ниво од пред должничката криза“, изјави Сајмон Вајт, стратег во МЛИВ (MLIV).
Силната побарувачка на аукцијата покажува дека инвеститорите во еврозоната сè уште се подготвени да инвестираат во хартии од вредност со подолг рок на достасување, иако треба да се напомене дека Австрија минатата недела се откажа од својот план за издавање 86-годишна обврзница.
Септември често е време на интензивно издавање долгови низ целиот свет. Во САД инвеститорите исто така беа подготвени да купуваат поради идните потези на Федералните резерви (Фед), кои исто така се очекува да ги намалат каматните стапки.
Се очекува дека емисиите на обврзници во Европа во текот на септември, по денешниот ден, 11-ти во месецот, ќе достигнат 93 милијарди евра. Од почетокот на годината е издаден долг во вредност од 1,4 трилион евра, што е за 15 отсто повеќе од 2023 година, покажуваат податоците собрани од „Блумберг“ (Bloomberg).
Во организацијата на италијанската емисија учествуваа „Барклис“ (Barclays), „Банката на Америка“ (Bank of America), БНП (BNP Paribas), „Ситигруп“ (Citigroup) и „Сосиете женерал“ (Société Générale).
