Средбата меѓу Трамп и Џјинпинг донесе неизвесност на берзите и нов подем на златото

Акциите се движеа без јасен правец, а златото поскапе додека инвеститорите ги анализираа изјавите на американскиот претседател Доналд Трамп за средбата со кинескиот лидер Шји Џјинпинг, чија цел беше да се намалат трговските тензии меѓу двете најголеми светски економии.

Фјучерсите на американските берзански индекси паднаа за 0,1 отсто, откако Трамп изјави дека имал „одлична средба“ со Џјинпинг и дека веднаш ќе ги намали царините за фентанил од 20 на 10 отсто. Договорите за Nasdaq 100 се спуштија за 0,2 отсто, бидејќи Трамп рече дека разговарал за пристапот на Кина до чиповите на „Енвидија“ (Nvidia Corp.), но нагласи дека нема да дозволи извоз на најнапредната линија „Блеквел“ („Blackwell“). Индексот на азиските акции ослабе за 0,2 отсто, со што ги поништи претходните добивки, а пад забележаа и кинеските берзи.

Доларот ги намали добивките од претходната сесија, додека приносот на десетгодишните американски обврзници се спушти за еден базичен поен – на 4,06 отсто. Јенот колебливо се движеше во однос на доларот, откако Банката на Јапонија го задржа клучниот каматен процент. Цената на златото порасна за 1,2 отсто.

„Акциите се движeа нагоре пред средбата на Трамп и Џјинпинг, но пазарите потоа беа разочарани од недостигот на детали“, изјави Ана Ву, стратег за повеќесекторски инвестиции во „Ван Ек“ (Van Eck Associates Corp.). „Пазарите го гледаат ова како привремено примирје, а не како долгорочен договор, што значи дека среднорочните изгледи би можеле да останат нестабилни“, додаде таа.

Инвеститорите шпекулираа дека средбата меѓу САД и Кина ќе помогне да се намали најголемиот трговски спор во светот и да се стабилизираат глобалните пазари по месеци тензии. Од трговскиот колапс во април предизвикан од царините, индексот S&P 500 забележа силен раст поттикнат од оптимизмот околу вештачката интелигенција и очекувањата за намалување на каматните стапки од Федералните резерви. Но, Федералните резерви во средата ги предупредија инвеститорите дека евентуалното намалување во декември не е сигурно.

Bloomberg

Трамп изјави дека имал „одлична средба“ со Џјинпинг, на која бил постигнат трговски договор со кој САД веднаш ќе ги преполоват царините поврзани со фентанил за кинеските производи.

Според него, договорот предвидува и Кина да ги обнови набавките на соја и да ја суспендира својата лиценцна програма за ретки минерали најмалку една година.

Претходно, по очекуваното намалување на каматните стапки од страна на Федералните резерви, претпазливиот тон на Џером Пауел во врска со идните чекори и неговиот фокус на ризиците на пазарот на трудот ги натераа инвеститорите да ги намалат очекувањата за понатамошно олабавување на монетарната политика.

Федералните резерви во средата го спроведоа второто последователно намалување на каматните стапки за да го поддржат ослабениот пазар на трудот и најавија дека од 1 декември ќе престанат со намалувањето на портфолиото на средства. Гувернерот Стивен Миран повторно се спротивстави, барајќи поголемо намалување, додека претседателот на Федералните резерви во Канзас Сити, Џеф Шмид, изјави дека воопшто не поддржува намалување на стапките.

Технолошкиот сектор остана во фокусот откако добивката на „Самсунг електроникс“ (Samsung Electronics Co.) ги надмина очекувањата, а најголемите американски компании го зголемија интересот околу темата за вештачка интелигенција.

Инвеститорите добија можност да ја пресметаат и потрошувачката на технолошките компании за вештачка интелигенција по објавата на резултатите на технолошките гиганти. Трите водечки компании – „Алфабет“ (Alphabet Inc.), „Мета платформс“ (Meta Platforms Inc.) и „Мајкрософт“ (Microsoft Corp.) – заедно потрошиле околу 78 милијарди долари за капитални инвестиции во изминатиот квартал, што е зголемување од 89 отсто во однос на истиот период лани.

Нивните резултати беа различни: акциите на „Мета платформс“ паднаа за 7,4 отсто во продолженото тргување, додека „Алфабет“ порасна за 6,7 отсто. „Мајкрософт“ забележа пад од речиси 4 отсто. Порано во текот на денот на американските пазари, „Енвидија“ (Nvidia Corp.) стана првата компанија што достигна пазарна вредност од 5 билиони долари.

 

Корпорациски вести

• Стартапот за вештачка интелигенција „Опен еј-ај“ (OpenAI) се подготвува да поднесе барање за првична јавна понуда (IPO) веќе следната година, што би можело да ѝ обезбеди пазарна капитализација од 1 билион долари, објави „Ројтерс“ (Reuters).
• „Тојота мотор“ (Toyota Motor Corp.) нема планови да го подобри понудениот договор за откуп на „Тојота индастрис“ (Toyota Industries Corp.) во вредност од 4,7 билиони јени (31 милијарда долари), изјави извршниот директор Коџи Сато, отфрлајќи ја широката критика околу планираната приватизација.
• Најголемиот јавен пензиски фонд во САД, Калифорнискиот систем за пензиско осигурување на јавни службеници (California Public Employees’ Retirement System) – планира да гласа против договорот за надомест од 1 билион долари за извршниот директор на „Тесла“ (Tesla Inc.), Илон Маск.
• Банката на Америка (Bank of America Corp.), „Ситигруп“ (Citigroup Inc.) и „Морган Стенли“ (Morgan Stanley) се меѓу 20-те банки што обезбедуваат заеми во износ од 20 милијарди долари за зделката за преземање на „Електроник артс“ (Electronic Arts Inc.).
• Групацијата „Ер Азија авијација“ (AirAsia Aviation Group) планира да собере до 600 милиони долари, заменувајќи го приватниот кредитен аранжман со обврзница со пониска каматна стапка.

 

Главни движења на пазарите:

Акции

• Фјучерсите на S&P 500 беа речиси непроменети до 14:20 часот по токиско време
• Јапонскиот Topix порасна за 0,4 отсто
• Австралискиот S&P/ASX 200 падна за 0,5 отсто
• Hang Seng во Хонгконг се намали за 0,7 отсто
• Shanghai Composite ослабе за 0,4 отсто
• Фјучерсите на Euro Stoxx 50 паднаа за 0,1 отсто

Валути

• Индексот Bloomberg Dollar Spot се намали за 0,1 отсто
• Еврото порасна за 0,2 отсто, на 1,1628 долари
• Јапонскиот јен беше речиси непроменет, на 152,83 за долар
• Офшор јуанот исто така остана речиси непроменет, на 7,1017 за долар

Криптовалути

• Биткоинот падна за 2,3 отсто, на 108.943,42 долари
• Етерот се намали за 2,2 отсто, на 3.865,59 долари

Обврзници

• Приносот на десетгодишните американски обврзници се намали за еден базен поен, на 4,06 отсто
• Приносот на јапонските десетгодишни обврзници остана непроменет, на 1,650 отсто
• Австралискиот десетгодишен принос се зголеми за осум базни поени, на 4,30 отсто

Суровини

• Цената на суровата нафта ВТИ (West Texas Intermediate) се намали за 0,5 отсто, на 60,17 долари за барел
• Цената на златото на спот-пазарот порасна за 0,7 отсто, на 3.958,51 долари за унца