Акциите на „Енвидија“ скокнаа по најавите на Трамп за продажба на чиповите „блеквел“ во Кина

Акциите на „Енвидија“ (Nvidia Corp.) го продолжија драматичниот раст и достигнаа рекордно ниво, откако американскиот претседател Доналд Трамп изјави дека ќе разговара со кинескиот лидер Шји Џјинпинг за процесорите „блеквел“ (Blackwell) на компанијата, кои се наменети за вештачка интелигенција (ВИ).

„Ќе разговараме за ‘блеквел’“, изјави Трамп во средата, во пресрет на неговата долгоочекувана средба со Шји, која ќе се одржи кон крајот на неделава. Тој го нарече чипот „супермоќен“ и додаде дека извршниот директор на „Енвидија“, Џенсен Хуанг, неодамна донел еден примерок од акцелераторот во Овалната соба.

Трамп пред неколку месеци изјави дека ќе размисли да ѝ дозволи на „Енвидија“ да извезува во Кина помалку моќна верзија на процесорот „блеквел“. Таков потег би значел голема победа за највредната компанија во светот според пазарна капитализација, важен сигнал кон Пекинг и пресврт во долгогодишната кампања на Вашингтон за ограничување на кинескиот напредок во областа на вештачката интелигенција.

Изјавите на Трамп ги разгореа очекувањата на инвеститорите дека ваква зделка би можела да биде тема на разговор неделава, во момент кога американскиот претседател се обидува да постигне сеопфатен договор со Пекинг и да ги намали тензиите по повеќенеделните трговски судири меѓу двете најголеми економии во светот.

Акциите на „Енвидија“ продолжија да растат за уште 8,5 отсто во азиското тргување на алтернативната платформа „Блу оушн“ (Blue Ocean). Изјавите на Трамп се надоврзаа на претходниот пораст од 6,8 отсто, поттикнат од низа настани што го одразија сè поголемиот оптимизам околу глобалниот бум на инфраструктурата за вештачка интелигенција.

Меѓу нив се резултатите што ги надминаа и највисоките очекувања, позитивната прогноза на „Енвидија“ за побарувачката на чипови и серијата договори што компанијата ги објави за време на конференција со висок профил во Вашингтон оваа недела.

Bloomberg

Но најважно прашање за инвеститорите е дали „Енвидија“ ќе добие поголем пристап до кинескиот пазар – најголемиот во светот за нејзините производи и наедно сè понапреден развивач на сопствени чипови и технологии за вештачка интелигенција.

„Енвидија“ се соочува со ефективна забрана за продажба на својата најмоќна ВИ-опрема во Кина уште од 2022 година, поради ограничувања што Вашингтон ги воведе од страв дека полупроводниците би можеле да ѝ дадат воена предност на кинеската влада.

Извршниот директор Џенсен Хуанг изјави дека овие правила, кои американските власти неколкупати ги заострија, ја урнале пазарната позиција на „Енвидија“ во Кина од 95 отсто на нула. Технолошкиот лидер е меѓу најгласните противници на мерките, тврдејќи дека тие само го поттикнале развојот на кинеската индустрија за чипови, што најдобро се гледа преку растот на компании како што е „Хуавеи“ (Huawei Technologies Co.).

Во игра се и огромни финансиски интереси за компанија што досега профитирала повеќе од која било друга од експлозивниот раст на вложувањата во компјутерски системи за ВИ.

На почетокот од годинава, „Енвидија“ отпиша неколку милијарди долари очекувани приходи, откако администрацијата на Трамп воведе ограничувања за продажба на нејзиниот помалку напреден процесор H20, специјално дизајниран за кинескиот пазар.

Само неколку месеци подоцна Трамп се согласи да издаде дозволи за „Енвидија“ за извоз на процесорите H20 во Кина, во замена за 15 отсто од приходите, договор што предизвика остри реакции меѓу противниците на Кина и во рамките на неговата администрација и надвор од неа.

Сепак, тие продажби никогаш не се реализираа. Пекинг ги обесхрабри кинеските компании да ги користат акцелераторите, како дел од пошироката стратегија за јакнење на домашниот технолошки екосистем.

„Претседателот ни даде дозвола да извезуваме во Кина, но Кина ни забрани да извезуваме во Кина“, изјави Хуанг пред новинарите на настанот на компанијата што се одржа неделава во Вашингтон.

„Тие многу јасно ставија до знаење дека во моментов не ја сакаат ‘Енвидија’ таму.“

Сепак, кинеските компании и понатаму посакуваат да ги користат процесорите на „Енвидија“ и во голема мера се потпираат на нејзиниот софтверски екосистем. Пристапот до уште помоќните процесори од серијата „Блеквел“, кои веќе се индустриски стандард што го користат компании како „Мета“ (Meta Platforms Inc.) и „Опен еј-ај“ (OpenAI), би бил огромен поттик за кинеската ВИ-индустрија.

Големо прашање, сепак, е како тоа се вклопува со приоритетите на Пекинг. На состанокот на Централниот комитет на Комунистичката партија минатата недела, кинеските лидери повикаа на поголема самостојност во напредните технологии, особено во областа на полупроводниците и вештачката интелигенција.

И Трамп и Хуанг најавија дека неделава можеби ќе се сретнат во Азија, иако не е познато кога и дали таквата средба навистина ќе се случи.

„Џенсен, кој е навистина извонреден човек, можеби е тука“, рече Трамп на форумот за економска соработка во Азија и Пацификот (APEC) во Јужна Кореја. „Некој ми рече дека е тука.“