„Енвидија“ и „Опен еј-ај“ со договор од 100 милијарди долари за изградба на дата-центри

„Енвидија“ (Nvidia Corp.) ќе инвестира до 100 милијарди долари во „Опен еј-ај“ (OpenAI) за поддршка на нови дата-центри и друга инфраструктура за вештачка интелигенција, што ја нагласува растечката побарувачка за алатки со ВИ како ЧетГПТ (ChatGPT) и за компјутерската моќ неопходна за нивно функционирање.

Компаниите во понеделникот го објавија договорот, наведувајќи дека потпишале писмо за намера за стратешка соработка. Инвестицијата има цел да му помогне на „Опен еј-ај“ да изгради дата-центри со капацитет од најмалку 10 гигавати електрична енергија, опремени со напредните чипови на „Енвидија“ за тренирање и примена на ВИ-модели.

Според добро упатени извори, средствата ќе бидат обезбедени во фази, при што првите 10 милијарди долари ќе бидат исплатени кога ќе се потпише договорот. „Енвидија“ ќе ја направи инвестицијата во готовина и ќе добие удел во „Опен еј-ај“ како дел од договорот, додаваат изворите, кои побарале останат анонимни. Понатамошни транши ќе следуваат со секое пуштање во работа на нов гигават компјутерска моќ.

Инвеститорите го поздравија договорот, со што акциите на „Енвидија“ пораснаа за 3,9 отсто во тргувањето во Њујорк. Годинава акциите на компанијата имаат раст од околу 37 отсто, зацврстувајќи го статусот на „Енвидија“ како највреден бизнис на светот. „Опен еј-ај“, пак, е најголемиот стартап во областа на технологијата. „Блумберг њуз“ (Bloomberg News) минатиот месец објави дека компанијата била во рани разговори за продажба на акции со која би се вреднувала на 500 милијарди долари.

Bloomberg

Компаниите се меѓу предводниците на глобалната иницијатива за изградба на дата-центри за новата генерација на алатки со вештачка интелигенција, потфат што се очекува да чини вкупно трилиони долари. За ова се потребни напредни чипови, сервери, системи за ладење и огромни количества електрична енергија.

Обемот на проектот на „Енвидија“ и „Опен еј-ај“ би бил особено голем: десет гигавати се еднакви на врвната побарувачка на електрична енергија во Њујорк.

„Оваа инвестиција и инфраструктурно партнерство го означуваат следниот голем чекор, пуштање во работа на 10 гигавати за напојување на новата ера на интелигенцијата“, изјави извршниот директор на „Енвидија“, Џенсен Хуанг.

„Енвидија“ го користи своето финансиско влијание за да се осигури дека технологијата на компанијата останува во срцевината на ВИ-системите. Со договорот со „Опен еј-ај“, таа ги зајакнува врските со клучен сојузник. Стартапот го создаде водечкиот четбот на пазарот, ЧетГПТ, и работи на проширување на сопствената ВИ-инфраструктура. Договорот е сигнал дека „Опен еј-ај“ ќе остане клучен клиент на „Енвидија“, иако компанијата бара и други доставувачи.

Bloomberg

„Енвидија“ се позиционира и како застапник на домашната технолошка инфраструктура, приоритет на администрацијата на Трамп. Производителот на чипови со седиште во Санта Клара, Калифорнија, работи на градење добри односи со Белата куќа во време кога му е потребно Вашингтон да ги олесни ограничувањата за извоз кон Кина.

Минатата недела „Енвидија“ се согласи да инвестира до 5 милијарди долари во „Интел“, производител на чипови што со години се бори со тешкотии и кој сега делумно е во сопственост на американската влада.

Во понеделникот извршниот директор на „Опен еј-ај“, Сем Алтман, изјави дека договорот со „Енвидија“ ќе доведе до нови пробиви во ВИ благодарение на обезбедувањето на неопходната компјутерска моќ.

„Сè започнува со компјутерската моќ“, рече тој. „Инфраструктурата за пресметки ќе биде основа за економијата на иднината.“

ЧетГПТ на „Опен еј-ај“ го користат околу 700 милиони луѓе неделно, а за негово одржување и развој на нови производи е потребна интензивна компјутерска моќ. Во минатото компанијата се соочуваше со ограничувања во способноста да ја задоволи побарувачката на клиентите, особено при лансирање нови производи. Во неделата Алтман објави на социјалните мрежи дека неговата компанија ќе претстави нови производи „со голема компјутерска побарувачка“ во следните неколку недели.

„Енвидија“ и „Опен еј-ај“ не дадоа детали за инвестицијата во „Опен еј-ај“, ниту пак кога би се реализирала.

Во своето соопштение за договорот, компаниите рекоа дека „со нетрпение очекуваат финализирање на деталите од оваа нова фаза на стратешко партнерство во наредните недели“.

Според Хуанг, проектот ќе опфати дури 5 милиони чипови на „Енвидија“, бројка еднаква на вкупната испорака на компанијата за годинава. Во интервју за Си-ен-би-си (CNBC), тој го нарече „џиновски проект“. 

„Енвидија“ исто така беше дел од неодамнешни договори за проширување на компјутерската инфраструктура во Велика Британија, Франција и Блискиот Исток, а поддржа и повеќе стартапи во областа на ВИ.

„Изгледа дека Хуанг моментално е во серија на договори“, изјави Стејси Расгон, аналитичар во „Бернстин рисрч“ (Bernstein Research). „Но, обемот на ова партнерство со ‘Опен еј-ај’ изгледа дека ги надминува сите други.“

Влијанието врз приходите од партнерството веројатно ќе биде поголемо од самата инвестиција, додаде тој. Еден гигават капацитет на дата-центар би вклучувал неколку десетици милијарди долари вредност на производи од „Енвидија“, процени Расгон.

„Енвидија“ истакна дека договорот со „Опен еј-ај“ нема да значи дека другите клиенти ќе бидат помалку приоритетни.

„Нашите инвестиции нема да го сменат нашиот фокус ниту ќе влијаат на снабдувањето на другите клиенти“, соопшти компанијата. „Ќе продолжиме секој клиент да го третираме како врвен приоритет, со или без удел во капиталот.“

Компанијата го заврши последниот квартал со 56,8 милијарди долари готовина и парични еквиваленти, а финансиската директорка Колет Крес изјави месецов дека „Енвидија“ ќе ја искористи својата сè поголема финансиска сила за да ги забрза воведувањето и употребата на компјутерската ВИ-моќ.

„Енвидија“ доминира на пазарот на ВИ-акцелератори, моќните чипови што помагаат во развојот и работењето на ВИ-модели. Нејзиното сè поголемо влијание врз технолошката индустрија предизвика внимателен надзор, а Министерството за правда на САД минатата година испитуваше дали производителот на чипови ги прекршил антимонополските закони. Американскиот претседател Доналд Трамп дури размислуваше за раздвојување на „Енвидија“ за да ја зголеми конкуренцијата, но призна дека на ривалите ќе им биде тешко да ја стигнат.

Договорот склучен во понеделникот е најновиот голем проект за дата-центри што е најавен годинава. „Опен еј-ај“ и „Оракл“ (Oracle Corp.) формираа партнерство за изградба на 5 гигавати капацитет на дата-центри, вклучувајќи објект што се гради во Абилен, Тексас, како дел од проектот наречен „Старгејт“ (Stargate).

Во јануари „Опен еј-ај“, „Оракл“ и „Софтбанк груп“ (SoftBank Group Corp.) рекоа дека ќе инвестираат 500 милијарди долари во 10 гигавати компјутерска моќ во наредните четири години.

Посебно, „Оракл“ преговара со „Мета платформс“ (Meta Platforms Inc.) за обезбедување 20 милијарди долари за облак-услуги за ВИ. „Мета“ исто така гради огромен дата-центар во Луизијана, кој се очекува да обезбеди до 5 гигавати капацитет. Поддржан е со финансии од најмалку 29 милијарди долари.

На почетокот на месецов „Мајкрософт“ (Microsoft Corp.) склучи повеќегодишен договор вреден речиси 20 милијарди долари за обезбедување облак-услуги за ВИ за своите проекти од „Небиус груп НВ“ (Nebius Group NV) и соопшти дека ќе изнајми такви услуги во Норвешка во вредност од 6,2 милијарди долари. „Мајкрософт“ истакна дека само во септемврискиот квартал ќе потроши 30 милијарди долари за проширување на своите дата-центри.

Истовремено, постои загриженост дека бранот на трошења за ВИ може да доведе до пазарен балон, нешто слично на бумот и падот на дотком-компаниите. Алтман минатиот месец призна дека постои балон, но нагласи дека ВИ ќе донесе променлива вредност за економијата и дека помалите преценети стартапи се тие што се најризични.