„Енвидија“ инвестира 5 милијарди долари во „Интел“ и планира заедно да дизајнираат чипови

„Енвидија“ (Nvidia Corp.) се согласи да инвестира пет милијарди долари во „Интел“ (Intel Corp.) и рече дека двете компании ќе развиваат заеднички чипови за персонални компјутери и центри за податоци, што е изненадувачки потег за да му се помогне на ривал што е во проблеми.

„Енвидија“ ќе купи обични акции на „Интел“ по цена од 23,28 долари по акција, соопштија двете компании денеска. „Интел“ ќе ја користи графичката технологија на „Енвидија“ во чиповите за персонални компјутери, а исто така ќе ги обезбеди своите процесори за производи за центри за податоци изградени околу хардверот на „Енвидија“. Двете компании не понудија временска рамка за продажба на првите делови и рекоа дека објавата не влијае на нивните индивидуални идни планови. Акциите на „Интел“ скокнаа за дури 26 проценти во претпазарното тргување.

Новите средства за „Интел“ доаѓаат откако американската влада во август се согласи да земе удел од околу 10 проценти, а претседателот Доналд Трамп ја презеде улогата на посредник. Јапонската „Софтбанк“ (SoftBank Group Corp.), која се обврза да инвестира десетици милијарди долари во производство на чипови и облачна инфраструктура во САД, минатиот месец направи изненадувачка инвестиција од две милијарди долари, а „Интел“ исто така собира пари и со продажба на средства на инвеститори. Нејзините тековни операции, погодени од загуби на пазарен удел, не можат да го поднесат товарот на интензивните трошоци поврзани со обидот за изградба на врвни полупроводници.

Спојувањето на двата конкурента со седиште во Санта Клара, Калифорнија, покажува како се променила рамнотежата на моќ во компјутерската индустрија. „Интел“ добива финансиска помош и пристап до водечка технологија на пазарот од компанија што некогаш ја потиснуваше на маргините на индустријата.

„Оваа историска соработка цврсто ги поврзува вештачката интелигенција на ‘Енвидија’ и забрзаното компјутерство со процесорите на ‘Интел’ и огромниот екосистем x86 - фузија на две платформи од светска класа“, наведе во соопштение главниот извршен директор на „Енвидија“, Јенсен Хуанг. „Заедно ќе ги прошириме нашите екосистеми и ќе ги поставиме темелите за следната ера на компјутерството.“

„Интел“ ќе понуди чипови за компјутери што комбинираат обработка за општа намена со моќни графички компоненти од „Енвидија“, помагајќи му подобро да се натпреварува со „Адвансд мајкро дивајсис“ - АМД (Advanced Micro Devices Inc.), која го зазема пазарниот удел кај десктоп и лаптоп-компјутерите. АМД е најблискиот конкурент на „Енвидија“ во сегментот на графичките чипови. Лидерот во вештачката интелигенција продолжува да проценува дали производството на своите чипови ќе му го препушти на „Интел“, но моментално нема планови за тоа.

Во центрите за податоци, каде што доминираат акцелераторите за ВИ на „Енвидија“, „Интел“ ќе им обезбеди на своите конкуренти процесори за интеграција во некои производи. Со оглед на тоа што „Енвидија“ сè повеќе ги комбинира своите чипови за ВИ во поголеми кластери за компјутерски процеси, од процесорите се бара да се справат со општите задачи за кои нејзините графички полупроводници не се идеално соодветни.

„Ја цениме довербата што Јенсен и тимот на ‘Енвидија’ ни ја дадоа со нивната инвестиција и со нетрпение ја очекуваме работата што претстои додека иновираме за клиентите“, рече извршниот директор на „Интел“, Лип-Бу Тан. „Архитектурата x86 на ‘Интел’ е основа на модерното компјутерство со децении - и ние иновираме низ нашето портфолио за да ги овозможиме работните оптоварувања на иднината.“

„Енвидија“ моментално ги дизајнира своите процесори - кои работат заедно со компонентите на акцелераторот - користејќи технологија од „Арм холдингс“ (Arm Holdings Plc). Претставниците на компанијата рекоа дека нејзините планови за интерните процесори не се променети.

На затворањето на вчерашното тргување „Интел“ имаше пазарна вредност од 116 милијарди долари, што значи дека „Енвидија“ зема помалку од пет проценти удел. „Енвидија“ има пазарна капитализација од над четири билиони долари.

Моќта на „Енвидија“ да ја одреди иднината на индустријата, а сега и прагматичниот обид на „Интел“ да работи заедно со таа компанија, се базира на апсолутната доминација на „Енвидија“ во ВИ-компјутерството. Компанијата ја увиде потребата од нови видови чипови и софтвер пред дебито на услуги како што е Чет ГПТ (ChatGPT) од „Опен еј-ај“ (OpenAI) и ги имаше подготвено пред кој било од нејзините конкуренти. Кога најголемите светски компании брзаа да изградат центри за податоци за да се осигурат дека можат да се натпреваруваат во новата ера на компјутерството, тие се свртеа кон чиповите на „Енвидија“.

Bloomberg Mercury

 

Во 2022 година „Интел“ имаше повеќе од двојно поголеми приходи од „Енвидија“. Компанијата што ѝ го даде името на Силициумската Долина доминираше во компјутерството, од лаптопи до центри за податоци со своите микропроцесори. Но таа беше бавна во поставувањето на типот на чип за забрзување што го нуди „Енвидија“ и не успеа да добие значаен пазарен удел во таа област.

Годинава „Енвидија“ е на пат кон продажба од околу 200 милијарди долари, според процените на Волстрит. Во одреден момент следната година компанијата ќе остварува повеќе приходи по квартал отколку „Интел“ за една година. Само нејзината единица за центри за податоци е поголема од продажбата на која било друга компанија за чипови.

Неуспехот на „Интел“ да ги предвиди и искористи трошоците за компјутери специфични за ВИ ги зголеми проблемите што ги трпеше од губењето на лидерската позиција во производството. Со децении фабриките на „Интел“ ја имаа најдобрата технологија за производство што ги правеше нејзините производи подобри, дури и ако другите произведуваа споредливи дизајни.

Сега компанијата е принудена да се сврти кон „Тајван семикондактор манфактуринг“ -ТСМЦ (Taiwan Semiconductor Manufacturing Co.) за да ги произведе своите најдобри чипови. Брзите подобрувања на технологијата на ТСМЦ им овозможија на многу компании - од „Епл“ (Apple Inc.) до „Енвидија“ - да ги претворат добрите дизајни во водечки производи во индустријата.

Под водство на новиот лидер Тан, донесен годинава за да го замени отпуштениот Пет Гелсингер, „Интел“ изјави дека ќе се стреми кон поотворен пристап, барајќи партнерства и отворајќи ги своите фабрики за конкурентите.

Во моментов нема коментари за веста. Биди прв да коментира...

Остави коментар