„Мајкрософт“ ќе плати 6 милијарди долари за наем на компјутерска моќност за ВИ во Норвешка

„Мајкрософт“ (Microsoft Corp.) ќе плати 6,2 милијарди долари за изнајмување моќност за вештачка интелигенција (ВИ) во Норвешка.

Британската компанија за центри за податоци „Енскејл глобал холдингс“ (Nscale Global Holdings Ltd.) и норвешката инвестициска компанија „Акер АСА“ (Aker ASA) ќе го обезбедат капацитетот, наведоа компаниите во соопштението испратено вчера. Проектот ќе биде напојуван од „обезбеден капацитет на мрежата и целосно обновлива електрична енергија“.

Акциите на „Акер“ денеска во Осло пораснаа за 7,7 проценти, на 769 круни (нешто над 66 евра), највисоко од февруари 2023 година. Акциите на „Мајкрософт“, пак, малку се променија пред отворањето на тргувањето.

Најголемиот светски производител на софтвер во последно време изнајмува повеќе капацитети во облак од доставувачи на трети страни, како што е „Корвејв“ (Coreweave Inc). Минатата недела „Мајкрософт“ потпиша договор вреден дури 19,4 милијарди долари со „Нибиус“ (Nebius Group NV). Овие таканаречени „неооблаци“ обично користат моќни чипови од „Енвидија“ (Nvidia Corp.) за да обезбедат компјутери за услуги за вештачка интелигенција.

Неделава „Мајкрософт“ информираше и за посебно партнерство со „Енскејл“ за развој на центар за податоци во близината на Лондон со повеќе од 23.000 напредни единици за графичка обработка. „Мајкрософт“ соопшти дека ќе потроши околу 15 милијарди долари за инфраструктура во облак во Велика Британија во следните четири години - најава што се совпадна со државната посета на претседателот Доналд Трамп на таа земја.

Во моментов нема коментари за веста. Биди прв да коментира...

Остави коментар