Трамп носи во Велика Британија низа ветувања од „Мајкрософт“ и „Опен-еј-ај“

„Мајкрософт“, „Опен-еј-ај“ и други американски компании ќе инвестираат десетици милијарди долари во технолошка инфраструктура во Велика Британија, како дел од серија бизнис-договори кои се совпаѓаат со посетата на претседателот Доналд Трамп на земјата оваа недела.

Технолошките гиганти посветуваат повеќе од 31 милијарда фунти (42,3 милијарди долари) на системи за вештачка интелигенција, иницијативи за квантно пресметување и други технолошки проекти, соопшти британското Министерство за наука, иновации и технологија во вторникот. Заедно со Трамп патуваат и неколку познати фигури од Силициумската долина, меѓу кои извршниот директор на „Енвидија“, Џенсен Хуанг, и Сем Алтман од „Опен-еј-ај“, која исто така го носи својот проект „Старгејт“ (Stargate) во Велика Британија.

Овие најави го зајакнуваат напорот на британскиот премиер Кир Стармер за продлабочување на врските со САД и поттикнување на технолошкиот раст. Тој вети забрзано одобрување на планирањето за дата-центри и олеснет пристап до електричната мрежа во Велика Британија, која има некои од најскапите цени на струја во Европа. Владата, исто така, најави отворање на нова „Зона за раст на ВИ“ (AI Growth Zone), центар за податоци за кој Лабуристичката партија на Стармер тврди дека ќе донесе нови работни места.

Bloomberg

Покрај технолошките договори, британскиот фармацевтски производител ГСК  вети инвестиција од 30 милијарди долари во САД во следните пет години — во фабрика за биолошки лекови, клинички испитувања, истражувања и воведување напредни технологии во своите американски производствени капацитети.

„Двете земји сега се здружуваат,“ рече Канишка Нарајан, заменик-секретар во британското Министерство за наука, на прес-конференција. „Во суштина, не станува збор само за историјата на нашите специјални односи, туку и за нашата иднина.“

Со договорите од Силициумската долина, Стармер избегнува тактика што ја користеа некои европски држави, особено Франција, која промовира домашни компании за вештачка интелигенција и ја нагласува својата независност од американската технологија.

„Опен еј-ај“ е во центарот на проектот „Старгејт“ за инфраструктура за вештачка интелигенција од 500 милијарди долари, кој Трамп го најави во јануари. Компанијата веќе изјави дека ќе го прошири проектот и во други земји. За британската операција, „Опен еј-ај“ и партнери како „Енскејл глобал холдингс“ ќе управуваат со околу 60.000 од најновите „блеквел“ процесори на „Енвидија“.

Од тој број, „Опен еј-ај“ размислува да користи околу 8.000 чипови во првиот квартал од 2026 година, со можност бројката да се искачи до 31.000 со тек на време. Британскиот „Старгејт“ проект ќе биде распослан на повеќе локации, вклучувајќи и новата зона за ВИ  во североисточна Англија. Нарајан одби да каже колкави ќе бидат инвестициите во овој проект.

Еве некои од другите најави:

- „Мајкрософт“ се согласи да потроши 30 милијарди долари во следните четири години на инфраструктура за вештачка интелигенција и на своите постоечки бизниси во Велика Британија — што компанијата го нарекува својата најголема финансиска инвестиција во Британија. Како дел од договорот, ќе изгради суперкомпјутер со повеќе од 23.000 напредни графички процесори, чипови кои се користат за работа на софтвер за вештачка интелигенција. Компанијата работи во партнерство со британската компанија за дата-центри „Енскејл“, а суперкомпјутерот ќе биде сместен во нивниот ВИ кампус во Лаутон, близу Лондон.

- „Енвидија“ изјави дека нејзината технологија ќе биде дел од инвестиција од 11 милијарди фунти во ВИ дата-центри во и надвор од Велика Британија. Компанијата соработува со „Енскејл“ и „Корвив“ (CoreWeave) на нови објекти кои ќе постават 120.000 ВИ акцелераторски чипови во Велика Британија до 2026 година. „Енскејл“ веќе користи чипови на „Енвидија“ во Велика Британија и други земји како дел од проект за компјутер базиран на 300.000 чипови, што, според американската компанија, ќе ја направи „глобален играч во инфраструктурата“. „Енвидија“  истакна дека инвестира во „брзо развивање на индустриската револуција на ВИ во Велика Британија“, но не откри колку пари троши и на кој начин.

- „Корвив“, која обезбедува капацитет на дата-центри за компании како „Опен-еј-ај“ изјави дека ќе инвестира 1,5 милијарди фунти во Велика Британија. Компанијата соработува со „Енвидија“ и шкотската компанија за дата-центри „Датавита“ (DataVita Ltd) за поставување на технологијата во објект во Чапелхол кој е во сопственост на „Датавита“. Тој дата-центар, кој користи обновлива енергија, ќе има капацитет од 31 мегават и ќе почне да работи од првиот квартал. Трошоците на „Корвив“  се додадени на 1 милијарда фунти што компанијата веќе ја инвестира во Велика Британија на две локации — Лондон Доклендс  и Кроули.

„Сејлсфорс“ (Salesforce)  продавач на софтвер за управување со клиенти, изјави дека ќе потроши дополнителни 2 милијарди долари во Велика Британија до 2030 година, што е продолжување на петгодишната програма од 4 милијарди долари објавена во 2023 година.

-На почетокот на неделата, „Алфабет“ (Alphabet, Google) изјави дека ќе потроши 5 милијарди фунти во наредните две години во Велика Британија, вклучувајќи отворање на дата-центар во Хертфордшир.

-„Блекрок“ (BlackRock) најави инвестиција од 500 милиони фунти во дата-центри. Извршниот директор на компанијата, Лари Финк, патува со Трамп во Велика Британија.

Велика Британија се приклучува на другите земји во светот во обидот да создаде локална инфраструктура за вештачка интелигенција — позната како суверена ВИ. „Енвидија“, највредната компанија во светот, го гледа овој тренд како клучен за својот идентитет и идниот раст.

Иако компанијата од Санта Клара, Калифорнија, веќе бележи голем раст на продажбата во последните две години, поголемиот дел од приходите ѝ доаѓа од мал број големи оператори на дата-центри. Иницијативата за суверена ВИ се очекува да придонесе за до 4 билиони долари трошоци за ВИ до крајот на деценијата, според Џенсен Хуанг.