Претседателот Доналд Трамп приреди вечера во Белата куќа со водечките луѓе од технолошкиот сектор, на која извршните директори на компании како „Мета“, „Епл“, „Мајкрософт“, „Гугл“ и „Опен еј-ај“ ветија значителни инвестиции во САД насочени кон развојот на вештачката интелигенција (ВИ).
Настанот се одржа во Претседателската државна трпезарија, откако поради лошо време беше преместен од новоуредената Градина на розите. Вечерата означи продлабочување на врските меѓу администрацијата на Трамп и Силициумската Долина, во време кога САД се натпреваруваат со Кина за глобално водство во ВИ-технологии.
Во воведното обраќање, Трамп се фокусираше на потребата од енергетска поддршка за центрите за податоци, ветувајќи дека ќе го олесни процесот на добивање дозволи и ќе обезбеди стабилен енергетски капацитет. „Предничиме пред Кина со голема разлика“, изјави тој.
Закерберг најави инвестиции од 600 милијарди долари
Претседателот го повика извршниот директор на „Мета“, Марк Закерберг, да зборува прв. Тој истакна дека компаниите инвестираат енормни суми во американската инфраструктура за да ја поттикнат наредната фаза на иновации.
„Сите компании тука прават огромни вложувања во земјата – градејќи дата-центри и инфраструктура за да ја поддржат иднината на иновациите“, рече Закерберг, додавајќи дека „Мета“ планира да инвестира најмалку 600 милијарди долари до 2028 година.
Трамп оваа бројка ја нарече „вистински голема“, повикувајќи се и на проектот на „Мета“ за изградба на центар за податоци во Луизијана вреден 50 милијарди долари.
Вештачката интелигенција стана централна тема на политичката и економската агенда на Трамп. Неговиот „ВИ-цар“, инвеститорот Дејвид Сакс, веќе промовираше стратегија за дерегулација, зголемени вложувања во истражување и домашно производство на енергија – мерки насочени кон одржување на водството на САД во технолошката трка со Кина.
Покрај тоа, Белата куќа објави дека ХЕ (Hitachi Energy) ќе инвестира над 1 милијарда долари во мрежна инфраструктура за поддршка на растечките енергетски потреби на ВИ-индустријата.
Многу компании ја искористија можноста да ги истакнат своите планови за инвестиции во САД, делумно поттикнати од трговските царини што администрацијата ги наметнува за увоз, за да го поттикне домашното производство на критична технологија.
Претседателот даде сигнал дека компаниите што инвестираат во САД би можеле да добијат ослободување од дел од царините, особено споменувајќи го Тим Кук од „Епл“. „Тим Кук ќе биде во доста добра позиција“, рече Трамп, алудирајќи на можни исклучоци за увоз на полупроводници.
Поддршка и од првата дама
Претходно истиот ден извршните директори се сретнаа со првата дама, Меланија Трамп, која ги пофали како визионери и ги повика на одговорно водење на ВИ-иновациите во општеството.
На вечерата присуствуваа и коосновачот на „Гугл“, Сергеј Брин, извршниот директор на „Мајкрософт“, Сатија Надела, Бил Гејтс, Сам Алтман од „Опен еј-ај“, како и извршните директори на „Оракл“ и АМД – Сафра Кац и Лиза Су.
.webp){kind=icon}
