„Хуавеј“ ја претстави својата ВИ чип-стратегија за ривалство со „Енвидија“

„Хуавеј технолоџис“ (Huawei Technologies Co.) во четвртокот ја претстави својата нова технологија – од мемориски чипови до ВИ-акцелератори – и за првпат јавно го изложи повеќегодишниот план да ја оспори доминацијата на „Енвидија“ (Nvidia Corp.) на растечкиот пазар.

Главна точка на презентацијата во четвртокот беа новите кластер-дизајни „Суперпод“ (SuperPod), кои ќе му овозможат на „Хуавеј“ да поврзе до 15.488 свои процесорски единици „Асенд“ (Ascend) за вештачка интелигенција и да ги управува како единствен систем, изјави на настанот ротирачкиот претседател Ерик Шју. Овие суперпод-производи ќе бидат изградени со нови генерации на чипови „асенд“ од следната година.

Следната генерација „асенд 950“ ќе биде придружена со нова меморија со висока пропусна моќ, дизајнирана од самиот „Хуавеј“, рече Шју, без да открие кој ќе ги произведува полупроводниците. „Хуавеј“ исто така планира да лансира „асенд 960“ кон крајот на 2027 година, по што во 2028 година ќе следува моделот „асенд 970“.

„Ова е значајна пресвртница во долгиот поход на Кина за развој на индустријата за ВИ-чипови“, изјави Чарли Даи, потпретседател на „Форестер рисрч“ (Forrester Research). „Овој успех одразува пробиви во дизајнот на системите, технологиите за меѓусебно поврзување и локалните капацитети за производство. Тоа е сигнал за посилен поттик кон самостојност и отпорност во услови на извозни ограничувања.“

„Хуавеј“, со седиште во Шенжен, е најнапредниот кинески дизајнер на чипови и најсилен кандидат за изградба на алтернативи на водечките хардвери за ВИ на „Енвидија“. Вашингтон со години го блокира извозот на најдобрите производи на „Енвидија“ во Кина, а Пекинг неодамна им наложи на најголемите технолошки компании да не ја користат графичката картичка RTX Pro 6000D на „Енвидија“, наменета за работни станици, која може да се приспособи за работа со вештачка интелигенција.

Овој потег претставува јасен обид на кинеските лидери да ја намалат зависноста на земјата од хардверот на „Енвидија“ и да ги зајакнат домашните алтернативи.

Како и неговиот американски конкурент, „Хуавеј“ развива системи што комбинираат повеќе од неговите ВИ-чипови во помоќни кластери. Новообјавениот „атлас 950 суперпод“ (Atlas 950 SuperPod) ќе обезбеди 6,7 пати поголема пресметковна моќ од претстојните системи NVL144 на „Енвидија“, изјави Ерик Шју. „Хуавеј“ исто така планира суперкластер со околу еден милион графички картички, базиран на новата суперпод-технологија.

На почетокот на годинава основачот на компанијата Рен Женгфеј изјави за државниот весник „Пиплс дејли“ (People’s Daily) дека „Хуавеј“ сè уште заостанува зад САД во поглед на продукцијата од еден чип, но „сè уште можеме да ги добиеме резултатите што ги сакаме со надоместување преку пресметки базирани на кластери.“

Агресивниот пристап му помага на кинескиот лидер во ВИ-чипови да извлече поголема ефикасност од своите полупроводници, иако компанијата се соочува со ограничувања во производството, бидејќи не може лесно да премине на понапредни технологии поради трговските ограничувања за врвна опрема.

Иако тоа не претставува голем пробив во чип-технологијата, решението на „Хуавеј“ е најнов пример за напорите на кинеските фирми да развијат домашни алтернативи и да го намалат влијанието на американските санкции.

Кинеските технолошки акции забрзано растат во изминативе недели, поттикнати од перцепцијата дека водечките компании во земјата прават стабилен напредок во развојот на домашни решенија за вештачка интелигенција и чипови. „Алибаба груп холдинг“ (Alibaba Group Holding Ltd.) и „Бајду“ (Baidu Inc.) се меѓу компаниите што обезбедија важни клиенти за своите дизајни, додека „Кембрикон технолоџис“ (Cambricon Technologies Corp.) – која се смета за репер на кинескиот сектор за ВИ-чипови – годинава бележи значителен раст на пазарната вредност.

Индексот Hang Seng Tech го продолжува подемот поттикнат од оптимизмот за ВИ

Напредокот на „Дипсик“ (DeepSeek) и други достигнувања ги зголемија очекувањата за иднината на ВИ во Кина

Bloomberg

Меѓу другото, кинеските власти ги обесхрабруваа компаниите да го користат чипот H20 на „Енвидија“, дизајниран за работни задачи за вештачка интелигенција. Иако насоките не претставуваат директна забрана, тие сепак имаа обесхрабрувачки ефект. „Енвидија“, и покрај тоа што доби официјално одобрение од Вашингтон за дел од извозот на H20, минатата недела соопшти дека не ги реализирала тие пратки. Тоа создава уште поголем јаз на кинескиот пазар што домашни производители како „Хуавеј“ и „Кембрикон“ можат да го пополнат.