„Хуавеј“ гради тајни фабрики за чипови, тврди американско трговско здружение

Водечка асоцијација на светски производители на чипови предупредува дека „Хуавеј“ (Huawei Technologies) гради низа тајни фабрики за полупроводници низ Кина, мрежа на производствени капацитети во сенка што ќе ѝ овозможи на кинеската компанија, која е на црната листа на САД, да ги заобиколи санкциите и да ги следи своите амбициозни технолошки планови.

„Хуавеј“, контроверзниот производител на телекомуникациска опрема и една од спорните точки во тензиите меѓу САД и Кина, започнал со производство на чипови минатата година и добива околу 30 милијарди долари државна поддршка од владата, според Здружението на индустрија за полупроводници (Semiconductor Industry Association - SIA) од Вашингтон. Компанијата купила најмалку две постоечки фабрики и гради уште најмалку три, посочува здружението во извештај до своите членови во кој „Блумберг“ имал увид.

Американското Министерство за трговија го стави „Хуавеј“ на листа во 2019 година, забранувајќи му да соработува со американски компании во речиси сите околности. Но, ако „Хуавеј“ гради и купува погони под имиња на други компании без да ја открие својата вмешаност, како што тврди СИА, телекомуникацискиот гигант би можел да ги заобиколи тие ограничувања и директно да купува американска опрема за производство на чипови и други материјали кои инаку би биле забранети.

Бирото за индустрија и безбедност (BIS) при Министерството за трговија, како одговор на прашањата на „Блумберг њуз“ за предупредувањата од СИА, кои претходно не беа објавени, рече дека ја следи ситуацијата и е подготвено да преземе акција доколку е потребно. Ова тело на црната листа веќе стави десетици кинески компании заедно со „Хуавеј“, вклучително и две за кои СИА вели дека се дел од мрежата на „Хуавеј“ - „Фуџијан Џинхуа“ (Fujian Jinhua Integrated Circuit) и PXW (Pengxinwei IC Manufacturing).

„Со оглед на тоа што им беа наметнати строги ограничувања, не е изненадувачки што 'Хуавеј', 'Фуџијан Џинхуа', PXW и други побараа значителна владина поддршка за развој на домашни технологии“, изјавија од канцеларијата за „Блумберг“. „БИС постојано го прегледува и ажурира својот систем за контрола на извозот врз основа на промените во опкружувањето и, како што е потврдено со правилата од 7 октомври 2022 година, нема да се двоуми да преземе соодветни мерки за заштита на националната безбедност на САД“.

Минатиот октомври, администрацијата на Бајден воведе извозни контроли кои ги спречуваат сите кинески компании да набават одредени напредни полупроводници и опрема за производство на чипови, за да ги ограничи воените капацитети на земјата. На кинеските компании обично им е дозволено да купуваат опрема за производство на чипови од постара генерација, машини кои користат технологија од 28 нанометри или повеќе. Сепак, на компаниите на црната листа како „Хуавеј“ им се забранети такви нелиценцирани купувања и овие исклучоци се ретки.

Bloomberg

„Запознајте го купувачот“

„Хуавеј“, „Фуџијан Џинхуа“, PXW и други компании идентификувани од СИА како дел од мрежата не одговорија на барањата за коментар. Пекинг изрази жестоко противење на американските контроли на извозот, со контраобвинувања дека САД исто така ги субвенционираат своите национални шампиони.

Не е јасно зошто СИА сега алармира за овие прашања. Лоби групата со седиште во Вашингтон ги претставува повеќето светски производители на чипови, вклучувајќи ги „Интел“, јужнокорејската „Самсунг Електроникс“ и тајванската ТСМЦ  (Taiwan Semiconductor Manufacturing). Нејзините членови, исто така, вклучуваат компании кои произведуваат опрема за правење чипови, како што се АМ (Applied Materials) и холандскиот АСМЛ (ASML Holding).

Некои членови на лоби групата ќе се соочат со конкуренција од кинеските ривали доколку тие бидат успешни во изградбата на домашни производствени капацитети, но членовите на СИА како АСМЛ и „Енвидија“ (Nvidia) губат приходи од Кина поради строгите контроли на извозот на САД. Здружението можеби се обидува да ги предупреди членовите да бидат претпазливи околу можна соработка со компании кои веројатно имаат скриени врски со субјекти од црната листа како „Хуавеј“.

Според прописите на БИС, добавувачите од САД имаат обврска „да го запознаат својот клиент“, што подразбира да ги проверат купувачите дали се поврзани со какви било сомнителни околности, како што се купувања што не се во согласност со нивните потреби.

„Ако има некакви индикации за загриженост, имате обврска да го истражите тоа“, рече Кевин Волф, партнер во адвокатската фирма „Акин Гамп“, кој работел на политиките на БИС во Одделот за трговија. „Во отсуство на такво 'црвено знаме', нема обврска подлабоко да се истражува компанијата“.

СИА ги предупреди компаниите членки и администрацијата на Бајден во април. САД размислуваат за построга контрола на извозот во Кина.

Кинеската Комунистичка партија ја осуди американската влада за ограничување на извозот на технологија во земјата, тврдејќи дека САД се обидуваат да го запрат нејзиниот економски развој. Пекинг соопшти дека ќе развие свои локални алтернативи за чипови, производствени машини и критични технолошки компоненти.

Во моментов нема коментари за веста. Биди прв да коментира...

Остави коментар