САД вложуваат 52 милијарди долари во програма за производство на чипови

Администрацијата на Бајден ќе именува членка на раководството на Државниот универзитет во Пенсилванија да управува со нов проект за истражување и развој на полупроводници, и таа ќе го предводи тимот задолжен за спроведување на план од 52 милијарди долари за унапредување на економската и националната безбедност на САД.

Лора Вајс, потпретседателка на одделот за истражување на Универзитетот во Пенсилванија, ќе стане директорка на Канцеларијата за истражување и развој во рамки на планот „Чипови за Америка“ кој го спроведува Министерството за трговија, што исто така ќе инвестира 11 милијарди долари за изградба на напредна мрежа за дизајнирање компјутерски чипови и производствени капацитети.

Вајс на универзитетот се здобила со докторат по акустика. Таа го надгледуваше истражувањето на 12 академски колеџи, седум интердисциплинарни истражувачки институти и соработуваше со Центарот за истражување на морнарицата. Пред да се приклучи на Универзитетот во Пенсилванија, 13 години беше вработена во „Џорџија тек“ (Georgia Tech) .

Целите на новата програма ќе вклучуваат производство на последната генерација на полупроводници во САД, намалување на времето потребно од дизајн до комерцијализација и обука на работници - од техничари до инженери. Друга цел на програмата е да ги собере засегнатите страни од целата индустрија, од дизајнери на чипови до универзитети и државни колеџи, од државните и локалните власти до производителите, од синдикатите до инвеститорите.

Конгресот го усвои Законот за чипови и наука минатата година за да го поттикне домашното производство на најновата генерација чипови по пандемијата и блокадите поврзани со неа, како и застојот во синџирите за снабдување кој покажа колку Америка е зависна од Азија, особено од Тајван, што е честа мета на закани од Кина.

„Стимулациите за производство од Законот за чипови ќе го вратат производството на полупроводници во САД, а програмите за истражување и развој на чипови ќе ѝ овозможат на земјата водечка позиција во светот преку создавање силен екосистем за истражување и развој на полупроводници“, рече секретарката на Одделот за трговија, Џина Раимондо.

Ерик Лин, кој беше привремен директор на Канцеларијата за истражување и развој, ќе остане како заменик-директор, соопшти одделот за трговија.

Во моментов нема коментари за веста. Биди прв да коментира...

Остави коментар